Secretariat-ah thisen pek rûnpui huaihawt

Association for Vo­lun­tary Blood Donation (AVBD) leh Secretariat Administration Depart­ment (SAD)-te chuan nimin khan Mizoram Secretariat pisa tualah blood donation camp an huaihawt a, vawiinah chhunzawm leh a ni ang.

Mizoram Secretariat tuala blood donation camp hi Chief Secretary pawmpuinain AVBD leh SAD-te'n an huaihawt a ni a, nimin chawhma dar 10:15 khan chief secretary Lalmalsawma'n a hawng.

CS Lalmalsawma chuan, Mizote'n ze danglam bik an nei tih sawiin, "Tlawmngaihna lan chhuahtir ṭhin hnam kan ni a, thisen pek pawh hi tlawmngaihna lan chhuahtirna a ni. Thisen pek hi mi nunna chhanna leh mi dangte tana malsawmna nihna a ni. Thisen mamawhna a sang telh telh a, ni khata thisen pek chhuah a tam a, thisen pek kan uar zel a pawimawh a ni," a ti a; Secretariat-a thawkte tana thisen pek hun buatsaih a ni chu lawmawm a tih thu a sawi.

Nimina blood donation camp-ah hian Aizawl Civil Hospital blood bank-in mobile blood donation van hmangin thisen an la a, mipa 41 leh hmeichhia 12-te'n thisen unit 53 an pe a ni. Blood donation camp hi vawiinah chhunzawm a ni dawn a, AVBD leh SAD chuan Secretariat-a thawkte leh pisa dawrtu a rem apiangte thisen pe turin an sáwm a ni.

Secretariat kawt záwla blood donation camp huaihawt tur chungchangah hian SAD secretary B Lalthanliana chuan January 12, 2018 khan Circular a tichhuak a; blood donation camp-ah hian Mizoram Secretariat-a thawktute leh office dawrtu a thei apiang tan thisen pek theih a nih tur thu a tarlang.