KHAWTHLIR

Jubilee lawm
UPC (North East India) enkawl enkawl fahrah châwmna in, Audrene Scism Children Home, Khuangpuilam, Kolasib chuan nimin khan a din champa kum 25-na, silver jubilee an lawm a; home din a nih theihna tura bul ṭantu, Australia-a Rev. JW Downs te nupain an hmanpui. Audrene Scism Children Home hi UPC (NEI) general superintendent Rev. K Satinvela'n January 16, 1993-a a din a ni a, tunah hian naupang 41 leh thawktu mi 12 an awm mek a ni.

Republic Day
Mamit DC mawhphurhna la mektu, additional DC H Lianzela hoin nimin khan Mamita Republic Day hman dan tur sawiho a ni. Meeting-a an rel dan chuan, Republic Day hi GSA khelmualah hman a ni dawn a, parade contingent 15 tel tura beisei a ni. R-Day lawmna neih zawhah Mamit District Hospital, Buannel Children's Home leh Observation Home-te khuallianin a tlawh ang a, thilpek a hlan ang. Department hrang hrangte mawhphurhna leh chanvo inpek nghal a ni.

Police thiin hmu
2nd. battalion MAP-a constable Thangkilliana chu a awmna chin hriat a nih loh hnuah nimin chawhnu dar 2 vel khan Lunglei Luangmuala Tlabung pêng khâm hnuaiah thia hmuh a ni. Thangkiliana hi January 15, Thawhṭanni tlai aṭangin a awmna chin hriat a ni lo a, 2nd. MAP mi leh sate leh Lunglei Luangmual Branch YMA member-te'n an zawng a, nimin chawhnu khan thiin an hmu ta a ni.