Ramri hnaihah rahpuah bomb rap puak

Jitua Tongchangya (26), Burdukbanga, Lawngtlai district chuan January 15, Thawhṭanni zing dar 8 vel khan chawhmeh zawnga an ramkalnaah bomb a rap puak a, hliam tuarin, damdawi-inah enkawl mek a ni.

Thu dawn danin, Jitua Tongchangya hi a ṭhianpa Morokto Tongchangya nen Thawhṭanni zang kar khan chawhmeh zawngin ramah an kal a; Jitua Tongchangya hian rahpuah bomb phûm a rap palh a ni. Bomb puak hian Jitua Tongchongya kephah vei lam, a kheimit hnuai lam zawng a thlawh darh vek a, a ngal dinglamah hliam a tuar bawk.

Jitua Tongchangya hi nimin zing khan Lawngtlai District Hospital thlenpui a ni a, enkawl mek a ni. Amah enkawltu Dr Vanlalremsiama chuan, Jitua Tongchangya dinhmun chu hlauhthawnawm a nih loh thu a sawi. Nimin vek khan Lunglei Civil Hospital-ah thawn nghal a ni.

Burukbanga hi Lawngtlai aṭanga khawthlang lam, India leh Myanmar inrina aṭanga km. 5 vela hláa awm a ni a, rahpuah bomb kam hi Myanmar sipai kam nge, Arakan Army (hel pawl)-te kam tih hriat a ni lo.