Mizoram sorkarin pisa luah man Thla tin Rs. 16,66,517 a séng

Mizoram sorkar chuan sorkar department ṭhenkhatte pisa luah manah thla tin Rs. 16,66,517 a séng ṭhin. Kum 2014-2019 in­karah khan sorkar department tan in (buil­ding) 331 sak a ni a, chu'ng inte chu department 28-te tana sak a ni.

Vanglaini-in RTI Act hmanga a zawhna General Administration Department (GAD)-in a chhan danin, Mizoram sorkarin office atan district pakuaah mi in a luah mek a; department hrang hrangte'n pisa atan in 51 luah mekin, chu'ng atan chuan thla tin Rs. 16,66,517 hman ṭhin a ni. Chu chu kum khat (thla 12)-ah chuan Rs. 1,99,98,204 a tling.

Mizoram sorkar department zingah department bila in la nei loh hrim hrim vanga man chawia mi in luahtu awmchhun chu Information & Communication Technology (ICT) department a ni. GAD hotute sawi danin, sorkar department zingah department bila in nei lo, mahse, mimal in luah chuang lo - GAD, SAD, etc. ang chi a awm nual a, chu'ngte chu mahnia in neia chhiar an ni lo. Chutih laiin, department zinga mahnia in la nei lote tan Mizoram sorkarin hmalak zel a tum niin an tarlang. 

GAD-a thawkte chuan, Mizoram sorkarah department 44 a awm thu an sawi a; RTI Act hmanga zawhna, 'Mizoram sorkar department zingah department bila building nei engzat nge awm?' tih chhannaah, sorkar department 35-in an pualin in an nei tih tarlan a ni. Department pakuain in an la nei lo tihna a ni.

District hrang hrangah sorkar department-te'n an department bila in neia pisa atana an hman dan chu -  Aizawl district-ah 35, Lunglei district-ah 29, Siaha district-ah 18, Champhai district-ah 25, Kolasib district-ah 26, Serchhip district-ah 24, Lawngtlai district-ah 20, Mamit district-ah 21, Saitual district-ah 11, Khawzawl district-ah 12 leh Hnahthial district-ah 10 a ni. Pisa atana man chawia mi in luah chungchangah hian GAD Secretary chuan April 12, 2011 khan kaihhruaina a lo tichhuak tawh.

Hetih lai hian, Mizoram sorkar chuan kum 2014-2019 inkarah khan sorkar in hrang hrang 331 a sa thar a; chu'ng in sak thar 331-te chu department hrang hrang 28-te ta a ni.

District                In zat            Luah man

        (Thla 1-ah)

Aizawl                19                Rs.    13,47,482

Lunglei            6                    Rs.    66,965

Serchhip            3                    Rs.    16,113

Siaha                6                    Rs.    67,186

Lawngtlai            4                    Rs.    23,873

Mamit                3                    Rs.    37,560

Champhai        6                    Rs.    44,700

Hnahthial            2                    Rs.    44,038

Kolasib            2                    Rs.    18,600

1.     Planning & Programme Implementation

2.    FCSCA department

3.    Cooperation department

4.    Power & Electricity

5.    Art & Culture department

6.    Taxation department

7.    Public Works department

8.    Irrigation & Water Resources deptt

9.    Sericulture department

10.    Local Administration department

11.    UDPA department

12.    Sports & Youth Services deptt

13.    Secretariat Administration deptt

14.    Governors' Secretariat

15.    Environment, Forest & Climate Change

16.    Horticulture department

17.    Land Revenue & Settlement deptt

18.    Finance department

19.    Agriculture Department

20.    Information & Public Relations deptt

21.    Fisheries department

22.    Home department

23.    PHE department

24.    Health & Family Welfare deptt

25.    Rural Development department

26.    Tourism department

27.    AH & Vety department

28.    Social Welfare department