Dy. CM hoin telecom chungchang sawiho

Deputy chief minister Tawnluia hoin nimin khan a pisaah Khawzawl district leh Tuichang biala telecom service provider - BSNL, Airtel, Reliance Jio leh Vodafone hotute an ṭhukhawm a, Khawzawl district-a hmalak dan tur an sawiho.

Tawnluia chuan, sorkar hmalaknain district thar tihpui­tlinte zingah Khawzawl district a tel thu leh model district nih an tum thu sawiin, "He hmalakna kal zelah hian telecom service hi a pawimawh berte zinga mi a ni," a ti a; Covid-19 vanga inkharkhip chhungin sorkar, zirna-in, sumdawnna leh mimal thlengin telecom service-in awlsamna a siam thu a sawi.

Telecom service provider hotute hian an harsatna tawhte sawiin, sorkar puih an mamawhna te, hma an sawn theihna tur kawng nia an hriatte an sawi a; sorkar nen awmze nei zawka thawhho an duh thu an sawi bawk.