Online class titàwp turin MZP-in School Education minister ngen

MZP hruaitute chuan nimin khan School Education minister Lalchhandama Ralte chu a pisaah an kâwm a; inkhàrkhip vanga zirlaite harsatna tawh te, online class leh hostel fee chungchangte an sawipui. Inkhàrkhip laia online class kalpui chu zirlaite tan a rualkhai theih loh avangin chhunzawm a nih loh nana hma la turin an ngen.

MZP hruaitute chuan, sikul hrang hrangte'n zirlaite hmakhua ngaia online class an kalpui chu an thlàwp rualin, internet signal chak tâwk loh vang leh smart phone neih dan a inchen loh avangin an rualkhai thei lo a, chhungkaw tam tak tan phurrit a nih thu an sawi a; textbook-a hnâwl (omitted) tur sorkarin a la tihfel loh avangin zirtir tur chin a la chiang lo a, chuvang chuan online class chu mi tam tak tan harsatna lian tak thlentu a nih mek thu an sawi bawk.

Harsatna hrang hrang ngaihtuahin tun dinhmunah Mizoram pum thlirin, online class chu Mizo mipuiin an la zo loa a lan thu an sawi a, "Online class kalpui chhunzawm a nih loh nana hma la tur leh zirna kalpui a nih loh laia hostel fee la an awm loh nana hma la turin Minister kan ngen a ni," an ti.

Lalchhandama Ralte chuan, MZP rawtna leh thu thlente chu a ṭul anga lo en zui a, hma a lak tur thu a lo hrilh niin MZP chuan an tarlang.

MZP chuan, Central Board of School Education (CBSE) leh Council for the Indian School Certificate Examination (CISCE) ten Mizorama pawl 10 leh pawl 12 exam an buatsaih tur chu lawmawm an tih thu an tarlang a; SCERT-in inkhàrkhip laia zirlaite tana ni tin TV-a subject hrang hrang zirna an tichhuak ṭhin chu lawmawm an tih thu an sawi bawk.