AAY leh BPL-te bill ngaihhnathiam Department-in a buaithlak an ring ; Sorkarin thutlukna a la siam lo

Power & Electricity (PE) leh Public Health Engineering (PHE) department hotute chuan, BPL leh AAY chhungkuate electric bill leh tui bill-a ngaihhnathiamna siam chu a buaithlak an ring. Hemi chungchangah hian Mizoram sorkarin thutlukna a la siam lo.

June 24, 2021-a Central YMA bultuma pawl hrang hrangte leh political party aiawhte CYMA Committee Room-a ṭhukhawm chuan resolution hrang hrang an siam a; chung zingah chuan, 'Hripui léng vanga kan harsatna tawh mekte inchhâwk zângkhai a nih theih nan, in/ dawr luah man inngaihhnathiam ni se. BPL leh AAY chhungkuate sorkar bill hrang hrangah sorkarin ngaihhnathiam rawh se," tih a tel.

Pawl hrang hrangte thu­tlukna siam chu Central YMA hruaitute chuan chief minister Zoramthanga hnenah an thlen tawh a, chumi kal zelah chuan Chief Minister-in pawl leh poli­tical party hrang hrangte nen Covid-19 do chungchang sawiho­na a lo buatsaih tawh a ni.

BPL leh AAY-te ngaihhna­thiam­na pek chungchangah hian Chief Secretary chuan PE leh PHE department hotute a kâwm tawh a, thutlukna erawh an siam lo. Department pahnih hotute chuan Vanglaini palai zawhna chhangin, BPL leh AAY-te bill ngaihhnathiam chu thil buaithlak tak a nih tur thu an sawi.

PE leh PHE department hotute'n Vanglaini an hrilh danin, BPL leh AAY-a telte chu a tlangpuiin in leh lo nei lo, mi in luah an ni tlangpui a, an hmingin tui leh electric connection tih a ni lo tlangpui a, in neitute hmingin a kal deuh vek a ni. In luahtute chu in neitu ṭhenkhatin bill a hrana an chawitir laiin, ṭhenkhat chuan in luah manah an siam rem thung. BPL leh AAY zingah tui leh electric bill ngaihhnathiam tur nei lo eng emaw zat an awm dawn a ni.

Department pahnih hian connection an pekin BPL leh AAY an thliar hrang lo a, chuvang chuan anni chuan an hre hrang thei lo. Department dang, BPL leh AAY list an ring dawn a nih pawhin tute nge electric leh tui bill chawi ṭhin zawn chhuah leh a ngai dawn a ni.

PE department chuan mi harsa zual tak tak, tláwm zawka electric bulb pakhat chauh chhit theihna connection nei chu an awm thu an sawi a, "Hengte chauh hi ngaihhnathiam tur a nih chuan harsatna a awm lo. Mahse, hengah hian khawpui chhunga BPL leh AAY zingah hian tel an awm kherin a rinawm loh," an ti.

PHE department hotute chuan, thingtlangah chuan tui bill-ah an buai lo tih sawiin, "Village Water Sanitation Commi­ttee-in àwm an tih tâwk an khawn ṭhin. Tui lâkna kan siamsak hnu chuan a buaipui zui chu an kutah a awm," an ti a; harsatna lian tham a thlen a, Village Water Sanitation Committee suma chinfel theih a nih loh chinah chauh department-in an buaipui ṭhin tih an sawi.

Hetih lai hian, PHE leh PE depart­ment hotute chuan, sor­karin BPL leh AAY-te ngaih­hna­thiam tura thutlukna a siam a nih chuan thil tih theih loh tawp tur a nih loh tur thu an sawi a, "Hun erawh a duh rei khawp ang. Chu bakah, survey ti turin thawktu pawh indaih a ngai dawn a ni," an ti.