Siaha DTF-in district mipui an ngen

Siaha District Task Force (DTF) chuan, Covid-19 hripui laka inveng turin uluk leh zuala hri dái theu a ngaih avangin, khawtlang, kohhran chhungkua leh mimal tinte phurrit inchhâwk tawn nan thawk chhuak turin a ngen.

Mizoram páwn aṭanga hawte enkawlna atan mi tam takin sorkarah thilpek an hlàn tawh tih tarlangin Siaha DTF chuan, "Chu'ngte chu hmanraw thil ti theiah an chang mek a, kan lawm em em a ni. Kan rál beih hi a la zo lo a, thâ kan thlah a rem lo. Chuvangin, Siaha district-a cheng zawng zawngte i ṭang tlang ang u. Kan thâ kher thawh a rem lo thei a, sum leh pai kan thawhin kawng ro a su em em a, sorkar tan a ṭangkai em em a ni," an ti.

Siaha DTF chuan, "Ramin hun harsa a tawh mek lai hian sorkar thâ tichak tura kan pên chhuah a ngai ta. Kan hun tawng mek hi sorkar chauhin a mal khalh a tan chuan a hrawl deuh a ni. He rál donaa hnehna kan chan theih nan kan vaia kan ṭan tlân a ngai a ni," an ti a; district mipui, páwl leh kohhrante chu sum leh pai lama ṭang zel turin an ngen a ni.

Siaha DTF tarlan danin, an district hian state páwn aṭanga haw tur mi 1,300 chuang an nei a, Mizorama district 11 zingah Aizawl district tih lohah chuan haw tur nei ngah bei an ni. Haw tura inhriattir zinga a tam zawk chu an haw tawh a, kawnga thang mek leh la haw tur an awm nual bawk.