Mizoramah Covid-19 vanga thi Mi 100 an tling tawh
Nimin leh Nilaini tlai khan Covid-19 vangin mi pahnih an thi leh a, Mizorama hripui vanga thi chu mi 100 an chuang ta.
Covid-19 vei State Referral Hospital (ZMC)-a enkawl lai Lalsangzuala (43) h/o Lalthanpuii, Bawngkawn chu July 7, Nilaini tlai dar 5:50-ah khan a thi a, nimin chawhma dar 11 khan Bawngkawn YMA Hall-ah vui a ni. Amah hi Covid-19 positive a ni tih July 3, 2021-ah hmuh chhuah niin, SRH-ah enkawl nghal a ni a; natna dang nei sa a ni.
Nimin zing dar 7:15 khan H Thanmawia (88) f/o Lalrothara, Ramhlun North chu Covid-19 vangin SRH-ZMC-ah a thi a, nimin chhun dar 1 khan an venga RSC Field-ah vui a ni. Amah hi Covid-19 positive a ni tih June 25, 2021-ah hmuh chhuah a ni a, SRH-ah enkawl nghal a nih thu sorkar thuchhuakin a tarlang.
Sorkar chhinchhiah angin, nimin tlai dar 5 thlenga Mizorama Covid-19 vanga thi chu mi 101 an ni tawh a; October 28, 2020-ah thi awm ṭanin, kum 2020 chhungin mi pariat an thi a, kuminah mi 93 an thi tawh a ni.
