COVID-19: Mizoram dinhmun ; Hripui vei 548 hmuh belh a ni

July 7, Nilaini khan Mizoramah Covid-19 vei mi 548 hmuh chhuah a ni. Nimin khan hripui laka fihlim tawh mi 266 chhuahtir an ni a, hripui vanga thi mi pahnih an awm belh thung.

Covid-19 vei hmuh tharte chu mipa 265 leh hmeichhia 283 an ni a, ZMC laboratory-a hmuh chhuah mi 47, TrueNAT hmanga hmuh mi 33 leh RAT hmanga hmuh mi 468 an ni. Aizawla veng 46 leh khua/hmun dang 29-a mite an ni a; Lunglei khawpuiah veng paruk leh Kolasib-ah veng pariat a lang.

Hripui vei hmuh thar mi 548-te chu natna lang chhuak 166 leh lang lo 382 an ni a; tualchhunga kái 525 leh state páwn aṭanga lut 23 niin, tualchhunga kái zingah chuan kàina chin hriat loh mi 147 an awm. July thla chhungin mi 2,211 hmuh chhuah a ni tawh a, chawhrualin ni tin mi 315.86 hmuh chhuah ang a ni.

Mizoramah Covid-19 vei mi 22,703 hmuh chhuah a ni tawh a, mipa 12,863 leh hmeichhia 9,840 an ni. Nimin tlai dar 5 thleng khan mi 18,869 (83.11%) chhuahtir an ni tawh a, mi 101 (0.45%) thi tawhin, enkawl mek mi 3,733 (16.44%) an awm.

July 7, Nilainia swab sample endik dan chu - ZMC laboratory-ah Aizawla mi 837, TrueNAT hmangin district 11-ah 270 leh RAT hmangin district 11-ah 2,138 a ni a, a vaiin sample 3,245 (mipa 1,725 leh hmeichhia 1,520) niin, chuta ṭanga hripui vei hmuh chhuah 548 chu 16.88% a tling.

Nilainia district-a Covid-19 positive hmuh dan chu - Aizawlah mi 196, Lawngtlaiah 174, Kolasib-ah 81, Lungleiah 52, Siahaah 24, Mamitah 10, Champhaiah pasarih leh, Serchhip leh Hnahthialah pahnih ve ve an ni.
ZMC-a hmuh chhuah mi 47-te chu tualchhunga kái, hripui vei tawhte nena inkungkaihna nei vek an ni a, an zinga pangain symptom an nei. TrueNAT hmanga hmuh chhuah 33-te chu tualchhunga kái 19 leh state pawn aṭanga tun hnaia rawn lut 14 niin, symptom nei paruk an awm a; tualchhunga kai zingah kaina chin hriat loh 10 an awm.

RAT hmanga hmuh chhuah mi 468-te chu tualchhung kái 459 leh state páwn aṭanga tun hnaia rawn lut pakua an ni a, tualchhunga kái zingah kaina chin hriat loh 135 an awm a, mi 155 chu symptom nei an ni.
Sorkar thuchhuaha a lan danin, Covid-19 positive hmuh thar 548 zingah kum tling lo naupang eng emaw zat an awm a, a zat chiah hriat theih a ni lo a; tarlan chian zingah nausen kum khat tling lo pali awmin, a naupang ber chu thla khat a ni. Kum 60 chung lam 30 vel awmin, symptom nei an awm nual a, a upa ber pahnih kum 88 mite pawhin symptom an nei.

Nimin khan tlai dar 5 thlengin hripui laka fihlim tawh mi 226 chhuahtir an ni a; Aizawl district-ah mi 171, Lawngtlai district-ah 18, Lunglei district-ah 14, Mamit district-ah 13, Serchhip district-ah pasarih leh Khawzawl district-ah pathum an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 7,136 hmuh chhuah a ni tawh a, TrueNAT-PCR hmangin 1,443, RAT hmangin 14,123 leh Guwahati-ah pakhat hmuh chhuah a ni tawh.

IDSP tarlan danin, July 7, 2021 thlengin Mizoramah swab sample 5,13,712 endik a ni tawh a, chu'ng aṭanga Covid-19 positive hmuh tawh zat 22,703 chu 4.42% a ni. Hripui vei hmuh tawh zinga mi 18,792 chu Mizoram chhunga kái chhâwng an ni a, mi 3,911 chu Mizoram páwn aṭanga an rawn luh hnua hmuh chhuah an ni.