Thlamuang taka awm turin Rinliana'n mipui chah

Minister of state K Lalrinliana chuan nimin khan Chuhvel, Réngdil, Kawrthah leh Tuidam khuate a tlawh a, an dinhmun enfiahin, thlamuang taka awm turin mipui a chah.

K Lalrinliana hian May 30, 2021-a Mizo pakhat huana thlám sak mek, Assam lam mite'n kal chilha sa chhunzawm lo tura an tihna hmun Chuhvel khaw mipui chu thlamuang taka awm tura chahin, "Kan rama ruihhlo rawn tawlh rûk tum vèn a, kan ram chhunga hmasawnna hna thawh leh sipaite duty-na hmun siam hi sorkarin a ngaih pawimawh ber a ni," a ti.

Chuhvel khawtlangin an khua aṭanga Hnanglui zau panna kawng (km 1.7) siam ṭhat an dil chu a theih ang anga hmalakpui a tum thu Minister chuan a hrilh a; Chuhvel khuaah police outpost dah a nih theih nan hma la turin an lo ngen bawk.

Minister ṭawiawmtu Mamit DC Dr Lalrozama chuan, Chuhvel rama buaina awmah boruak muanawm a awm theih nan theihtawpa hmalak mek a nih thu a sawi a, "He lai huan ram pass hi John Halliday-a hian periodic patta number 122 of 1985, Mamit Assistant Settlement Officer aṭanga pek a nei a, a lei hma pawhin a neitu hi Mizo vek an ni," a ti.

Mamit DC chuan, Chuhvel rama boruak ṭha lo thleng palh thei veng turin 3rd Battalion MAP, 4th IR leh CRPF platoon khat an awm mek thu a sawi a; July 1, 2021 khan Home department hnenah security force dah belh tura ngenna a thlen thu a sawi bawk.

K Lalrinliana hian Rengdil leh Tuidam khuaa buhfai quintal 2,500 dah khâwl theihna tur kudam leh thawktute quarters sak mekte a tlawh a; Kawrthah PWD IB-ah FCSCA Secretary leh Director, Kawrthah PWD EE-te nen eirawngbawlna gas, petrol leh diesel lak luh chungchang an sawiho a, Teirei lei a tlawh nghal.

Minister hian Kolasib khawpuia veng 13-a VTF tana Joint VTF hnenah pawisa, buhfai leh hripui laka invenna hmaraw chi hrang hrang a pe a, chungte chu nimin khan sem a ni.