HIV/AIDS veite hamṭhatna tur hawng

Positive Women Network of Mizoram (PWNM) pisaah nimin khan PWNM, YWCA, Mizoram Drug User Forum (MDUF), leh Mizoram State Network of Positive People (MISNOPP)-te'n Covid Relief for Key Population hawnna an buatsaih a, Health minister Dr R Lalthlangliana'n a hmanpui.

Dr R Lalthangliana chuan, HIV/AIDS donaa PWNM, YWCA, MDUF leh MISNOPP-te hnathawh chu sorkarin a hriatpui thu a sawi a, "Covid léng mek do kawnga YMA, kohhran leh khawtlang ṭangrual ang chiah hian HIV/AIDS dona kawngah ṭanrual a ṭul. Khawvela rei lo tê kan awm chhung hian kan mihringpui harsatna tâwkte ṭanpui leh an tana rawngbawl hi kan tih theih hlu ber zinga mi a ni," a ti.

Inkhawma tarlan danin, HIV/AIDS vei, ruihhloa inchiu ṭhin, mahni inzuar (sex worker) leh chutiang kaihhnawiha harsatna tâwk zingah Covid-19 léng mek avanga harsatna hmachhawn an awm a; sum leh pai, ei leh in tur bakah, chenna tur nei lote an awm a ni.

Pawl palite hian United Nations Programme on HIV/AIDS (UNAIDS) leh Centre for Disease Control & Prevention (CDC)-ah HIV/AIDS veite ṭanpuina an dilsak a, an member mi 500-te tan ration, hmai tuamna leh kut tihfaina an dawng a ni. Covid-19 lockdown chhunga chênna tur nei lote awmna tur temporary shelter siamsak an remti bawk.

PWNM, MISNOPP, MDUF leh YWCA-te'n July aṭanga September, 2021 chhungin hmalakna hi an kalpui dawn a ni.