Vawk thi neitute zangnadawmna Sorkar laipuiah dilpui rêl a ni

Consultative Committee Meeting on African Swine Fever chu an chairman Dr K Beichhua, AH&Vety minister kaihhruaiin nimin khan Secretariat conference hall-ah an ṭhu a; AH&Vety department hriatpuinaa vawk suat (cull)-te tan sorkar laipuiah zangnadawmna dil ni se, an ti.

Ṭhutkhawmah hian, hri vanga vawk thite zangnadawmna scheme awm sate tarlan a ni a, chu chu sorkar laipui leh state sorkarin a zatve (50:50)-a an intum sem tur a ni. Category panga a awm a; zangnadawmna chu vawk kg. 15 hnuai lamah Rs. 2,200, kg. 15-40 inkarah Rs. 5,800, kg. 40-70 inkarah Rs. 8,400, kg 70-100 inkarah Rs. 12,000 leh kg. 100 chung lamah Rs. 15,000 a ni.

ASF avanga vawk thi, suat ni lote pawh record felfai taka vawn a ni a, vawk vulhtute hming leh Aadhaar number bakah, vawk thi zatte chhinchhiah zel a ni.

Disaster Management & Rehabili­tation department nen inráwnin, ASF vanga vawk thi, suat ni lote pawh zangnadawmna pek an nih theih nan a theih anga hmalak leh livestock insurance-ah pawh a theih ang leh a ṭul angin member-te'n hmalak ni se, an ti a; Mizorama ran vulh dan mumal tak, a vulhtute tih tur leh tih loh tur bakah, registration rules-te mamawh a nih avangin, dan siam (legislate) tura bawhzui ni se, an ti bawk.

Dr K Beichhua chuan, ASF vanga thi vawk neitute a tawrhpui thu sawiin, "Ei leh bâr, eizawnna tam tak a tikhaihlak a, vawk thi sâwngbâwl kawnga magistrate, police leh NGO-te'n inlungrual taka hma an la ṭhin hi a lawmawm tak zet a ni," a ti.

Consultative Committee on ASF-ah hian MLA pali - H Lalzirliana, Dr K Pachhunga, Lalduhoma leh KT Rokhaw te chu member an ni a; nimina ṭhutkhawmah hian Committee member-te bakah MLA C Lalmuanpuia leh mi pawimawh dangte an tel a ni.