KHAWTHLIR

Ramri sawiho
Kolasib bialtu MLA K Lalrinliana hoin July 7, Nilaini khan Kolasib Circuit House-ah DC Dr H Lalthlangliana, Joint VTF leh khawtlang hruaitute leh doctor-te an ṭhukhawm a; ramri thawm ṭhat dan tur leh Kolasib district-a community covid care centre din chungchang an sawiho. MLA hian Aitlang, Vairengtea Mizoram police duty post-a êng chhit nan generator leina tur Rs. 50,000 bawrhsap hnenah a hlan nghal a ni.

Thisen pe
Serchhip College-a NSS unit leh Red Ribbon Club-te chuan nimin khan an college-ah thisen pek an huaihawt a, Serchhip District Hospital tan thisen unit 24 an pe a, petute hmeichhia 13 leh mipa 11 an ni.

CM Relief Fund
Chief Minister's Relief Fund for Covid-19 ah nimin khan Mizoram Ayush Doctors’ Association-in Rs. 1,20,000 an chhûng lut. Covid-19 dona atana CMRF-a sum lut tawh zawng zawng chu Rs. 27,01,99,678 a ni a, Rs. 25,24,94,470 hman tawh niin, hman loh Rs. 1,77,05,208 a la awm.

Water filter pe
Nimin khan Serchhip DC meeting hall-ah Serchhip district-a sorkar sikul tihmasawn a, zirlai an neih tam theihna tura hmalakna, ‘Adopt a School' (Sikul Chhawm Rawh) tih hnuaia sikul vil tur bika thlan pali hnenah tui tihthianghlimna (water filter) pek a ni a; DC Kumar Abhishek-a'n a hmanpui. Bungtlang M/S-I leh East Lungdar P/S-II hnenah filter pali ve ve leh, Khumtung M/S leh Thenzawl H/S hnenah filter pathum ve ve pek a ni. 'Adopt a School' hi January 27, 2021 khan hawn a ni.

Containment zone
Aizawl DC chuan Salem Venga Chawngbawla section leh Zampuimanga section huam chhunga hmun ṭhenkhat chu containment zone-ah a puang a, a huam chhungah chhungkaw 31 an awm. Dawrpui, Armed Veng S, Ṭhuampui, Sairang Dinthar, Electric Veng leh Bethlehem Venga hmun ṭhenkhat, containment zone chu hlih a ni a, chutih rualin, heng vengah hian containment zone la ni chhunzawm hmun ṭhenkhat a awm bawk.