Longpuinghat-ah hripui vei 170 hmu

July 7, Nilainia Mizorama Covid-19 vei hmuh chhuah mi 548 zinga 170 chu Lawngtlai district-a Longpuighat khuaa mite an ni a; Kolasib Khuangpuilama TNT centre/home-ah hripui vei 46 hmuh chhuah a ni bawk.

Covid-19 positive mi 170 hmuhna Longpuinghat khua hi kum 2011 chhiarpui ang chuan mi 1,265 awmna a ni a; hripui vei hmuh chhuahte chu mipa 82 leh hmeichhia 88 niin, symptom nei an awm lo a, hripui vei tawhte nena inkungkaihna nei vek an ni.

Thutak Nunpuitu Team, Khuangpuilama awm mek zingah RAT hmangin Covid-19 positive mi 46 hmuh chhuah a ni bawk a, mipa 31 leh hmeichhia 15 niin, positive contact vek an nih thu sorkar thuchhuahin a tarlang.

Nilainia hripui vei hmuh chhuah tamna khua/veng dangte chu - Bethlehem Vengthlangah mi 21, Lunglei Venglaiah mi 19 leh Siaha district-a Saikao (Serkawr)-ah mi 12-te a ni.