MZP-in ramri humhalh tura hmalakna Chak lo an tih thu CM-ah an thlen

MZP General Headquarters chuan tun hnai khan chief minister Zoramthanga hnenah lehkha an thawn a; ramri humhalh tura Mizoram sorkar hmalakna chak tâwk lo an tih thu an thlen.

MZP chuan an lehkhaah hian, MNF kaihhruai sorkara Council of Minister-in July 8, 2019 khan Bengal Eastern Frontier Regulation (BEFR), 1875 chu Mizoram ramri atan an pawm thu an tarlang a, "Hei hi MZP chuan lawmawm kan tih rualin, thutlukna bawhzuia ramri humhalh tura sorkar hmalakna erawh a chak tâwk lo kan ti hle a ni," an ti.

Tun hnaia Assam sorkarin hma thar a lakna leh an inkulhna hmun chu BEFR 1875 ramri chhung a nih thu tarlangin MZP chuan, "Kan ram chhunga rawn inkulh Assam police-te hi a rang thei ang bera Mizoram aṭanga ûm chhuak turin Mizoram sorkar kan ngen a ni," an ti a; Assam police-te an inhnuhdawh hma chuan Assam sorkar chu eng level-ah pawh biak loh ni se an duh thu an tarlang.

MZP chuan, Mizo pi leh pute’n lu chhum bán chhum huama an sah kuak sa humhalh ngam lotu nih chu hnam phatsanna tluk hiala an ngaih thu tarlangin, "MZP chuan a theihtawp a lo chhuah tawh ṭhin a, thisen hial chhuaka hmalakna pawh kan nei tawh. Ramri chungchangah hian June 28, 2021 khan Delhi-ah Union Home Ministry-a Joint Secretary hnenah kan President hoin memorandum thehluh a ni," an ti.