Governor leh India Consul General-in Tourism chawikân dan tur an sawi dun

Governor Lt. Gen. Nirbhay Sharma leh Australia-a India consul general B Vanlalvawna chu January 16, Thawhlehni tlai khan Raj Bhavan-ah an inkawm a, tourism lama Mizoram chawikan dan tur an sawi dun.

Governor chuan, Act East Policy tihlawhtling tura hmarchhak ramte leh an ṭhenawm ram inkara inlaichinna ṭha siam a ṭul thu sawiin, "India palaite'n he mi kawngah hian mawhphurhna pawimawh tak an chelh a. Ministry of External Affairs leh North Eastern Council-te inkarah pawh thawhhona ṭha awm se a duhawm hle," a ti a; Mizo IFS la service mekte chu an awmna ram ṭheuha Mizoram tilâr tur leh khualzinte hîp thei tur zawnga thawk tura a duh thu a sawi.

B Vanlalvawna chuan, ruahmanna ṭha tak nen ram dang thleng pawha tourism chawikan theih a nih thu sawiin, theihtawp chhuah a tum thu Governor hi a hrilh a ni.