ZPM-in intuaitharna hun hmang

Ṭangrual pawl, Zoram People's Movement (ZPM) chuan, nimin khan ZNP pisaah intuaitharna hun an hmang a, ZPM Steering Committee vice chairman Lalthansanga'n kaihruaiin, resource person PL Liandinga'n thu a sawi.

PL Liandinga chuan, Mi­zorama roreltu inchher­chhuan ṭhinte leh ram leh mipui an enkawl dan a fuh tâwk loh avangin tuna Mizoram dinhmun chu India rama state pachhe ber leh hnufual ber a la ni tih sawiin, lungchhiatthlak a tih thu a sawi a, "Hnam ang pawhin a mualphothlak hle a, hetiang zela kan ram a kal chuan tun aia chhiatna rapthlak zawkah a inbarhlut ang tih a hlauhawm hle a ni," a ti.

PL Liandinga chuan, ZPM-in kalphung thar hmanga Mizoram siamṭhat an tumna kawnga an tih tur leh tih loh turte point hrang hranga siamin a sawifiah a; ZPM a sorkar chuan party sorkar ni loin, mipui sorkar a ding dawn a, inthliarna awm loin mi tinin inang vekin sorkar zár an zo dawn tih a sawi.

Inkhawmah hian ZPM treasurer F Rodingliana leh ZNP president Lalduhoma ten thu an sawi bawk.