Skill development chungchang zirna buatsaih

Extension Education Institute (EEI) for NE Region, Jorhat leh State Agricultural Mangement & Extension Training Institute (SAMETI), Mizoram ten ni li awh tur, Designing and Management of Skill Development Training Programme an buatsaih chu January 16 khan Agriculture (RE) director RK Nithanga'n Agriculture committee room-ah a hawng.

RK Nithanga chuan, thiamna leh finna tharte a thua hriat mai a tâwk lo tih sawiin, "Rem hre taka a taka thawh dan thiam tel a ngai a, chumi atan chuan skill development a pawimawh hle. A thua thiam, a taka thawk thiam lo kan tam viau chuan kan hnain a tuar thei a, a thua sawi thiam lem lo pawhin a taka an thiam bel hle chuan a ṭangkai zawk a ni," a ti.

Sorkar laipuiin skill development a ngai pawimawh tih sawiin RK Nithanga chuan, "Kum 2013 aṭangin Ministry of Skill Development & Entrepreneurship a din a, chu chuan National Skill Council of India (NSCI) te, Agriculture Skill Council of India (ASCI) a hring a ni," a ti a; ASCI chuan SAMETI, Mizoram chu provisional affiliation pein, kum 2017-18 chhungin training pe turin ṭum hnih a thlan thu a sawi.

Training-ah hian Agriculture, AH&Vety, Fisheries, Sericulture, Land Resources, Soil & Water Conservation department mite leh KVK leh district hrang hranga ATMA-a thawkte an tel a ni.