MPCC-in Covid-19 veite duhsakna hlân Thil man sang thunun turin sorkar ngen

Congress party chuan thu­chhuah siamin, Mizorama Covid-19 vei hmuh chhuah tharte chu an dam leh thuai theih nan duhsakna an hlân a, anmahni enkawltu damdawi lama thawkte duhsakna an hlân bawk. Chutih rualin, hripui léng vanga thil man sang chak lutuk thunun turin sorkar an ngen.

Phai lam hmun hrang hrang aṭanga Mizoram mi leh sa tangkhang tam tak dam taka Mizoram an thleng thei chu an lawmpui thu sawiin Cong­ress party chuan, "Lo la haw leh zel turte pawh duhsakna kan hlan. Hri léng kai darhtu an nih loh nana fimkhur taka khawsa tur leh thlamuang taka awm turin kan chah a ni," an ti.

MPCC chuan, hripui léng dona kawnga sorkar ruahmannate mipuiin an zàwm ṭha hlea an hriat thu sawiin, "Mizoram mipui thuawihna a ropui kan ti hle. Task force hrang hrang te, ramri venga duty mek police leh volunteer te, damdawi lama thawkte zawng zawng thawhrimna hi kan ngaihlu tak zet a ni," an ti a; phai aṭanga lo hawte buaipuitu Kolasib district leh district danga thawk te, lirthei khalhtute thawhrimna ropui an tih thu leh, Thantluanga, Kanan Veng-in RT-PCR khawl leina tur cheng nuai 21 a thawh chu ropui an tih thu an sawi.

Congress party chuan, hripui léng kaihhnawihah thil man a sang chak hle tih sawiin, thil man sang thunun dan kawng a rang lama ngaihtuah turin Mizoram sorkar an ngen a, "Mizorama bungraw lo lut reng reng sorkarin a rate uluk taka chhinchhiah a, mipuia zawrh chhuah lehna tur rate thlenga a hriatpui a, chak taka hma lak a ngai kan ti. A bikin chawhmeh leh sa chi hrang hrang man sang chak lutuk control tura rang taka hma la turin sorkar kan ngen a ni," an ti.