Champhai MJA-te'n KMMTTP an enfiah

Champhai district MJA-te chuan, NEDP hnuai­a ruahmanna hmang­in January 16, Thawh­lehni khan Kala­dan Multi Modal Transit Tranpost Project (KMMTTP) kawngpui sial mek a hmunah an enfiah.

Champhai journalist-te hi KMMTTP kawng siam enkawltu PWD Multi Modal Division-a SDO pathumin hna awm dante leh harsatna an neihte an hrilhfiah a; kawng siamtu company pahnih - RDS Project Ltd. leh Atlanta ARSS hotute an kâwm bawk.

Kawng siamtu company hotute chuan, KMMTTP kawng sialna leilung chu hmun eng emaw zatah a nghet tâwk lo a, leimin a tam avangin hnathawh a tisâwt lo tih an sawi a; nikum lama ruahtui tam lutukin hnathawh a tihṭhuanawp deuh ṭtih thu an sawi rualin, a hun taka zo hman turin theihtawp an chhuah thu an hrilh.

KMMTTP kawngpui sial mek hi hlawm thumah ṭhen a ni a; hlawm khatna leh hlawm hnihna chu June 30, 2018-a awh tura tih niin, hlawm thumna, Myanmar ramri lam dep chu December 31, 2018-a zawh tura tih a ni thung. Kawng hi km. 39.87-a thui blacktop tawh a ni a; blacktop chin chu metre 7 aia zîm lo tur niin, lei aṭanga blacktop chung ber thlenga kawngpui chhah zawng chu ft. 2.16 tur a ni.

Champhai MJA member-te hi IPRO Dr Lallawmkima hoin an kal a, Lawngtlai district MJA-te'n lo dawngsawngin, Thawhlehni zan khan Lawngtlai district MJA member-te nen LADC executive member Laltlawm­lova Chinzah-in Lawng­tlai Press CLub-ah zanriah a buatsaihsak.

Champhai district MJA member-te hian nimin zing khan Siaha an pan a, Siaha-a sorkar hmalaknate an tlawh leh a ni.