Congress sorkar chhungin link road Km. 1,591 laih a ni tawh - KS Thanga

19th January, 2018

Agriculture minister KS Thanga chuan, Agriculture department-in NLUP kalpui ṭan tirh aṭanga tun thlengin chhungkaw 26,147 hnenah ṭanpuina a pek tawh thu leh, Congress kaihhruai sorkar term hnih kal mek chhungin Agriculture link road km. 1,591 laih a nih thu a sawi.

Minister KS Thanga hian nimin khan a pisaah thuthar thehdarhtute a kâwm a; NLUP hnuaiah Agriculture department-in chhungkaw 26,147 hnenah ṭanpuina a pek tawh bakah, NLUP vangin RKVY hnuaiah sorkar laipui aṭangin cheng vbc. 462.775 hmuh a nih tawh thu a sawi a, "NLUP leh RKVY-te hi thil inzawm len inpui tawn ṭhin an ni a, RKVY hi department/agency 7-10 in hna thawh nan an hmang ṭhin," a ti.

KS Thanga sawi danin, kum 2012-13 aṭang khan RKVY-a sum hmuh aṭangin link road km. 773 sial a ni tawh a, leilet hectare 2,680-a zau siam a nih tawh a, power tiller 888 sem tawh niin, custom hiring centre 72 siam a ni tawh. Kum 2017-18 chhungin custom hiring centre 30 din belh tum a ni.

NEDP hnuaiah Mizoram sorkarin Agriculture sector atan kum 2016-17 ah cheng nuai 4,340 leh kum 2017-18 ah nuai 9,855, a vaiin nuai 14,195 a dah a, Agriculture link road atan bik kum 2016-17 ah nuai 2,600 leh kum 2017-18 ah nuai 3,000 a dah. NEDP hnuaia sum hmuh hmang hian link road km. 818 laih a ni tawh a; km. 402.50 dang lai tur leh km. 818 laih tawh chei ṭhat nan a thawktu tur thlan a nih tawh thu minister chuan a sawi.

Congress party kaihhruai sorkar term hnih chhunga Agriculture link road laih a tarlan dangte chu - link road 126 (km. 813.5) chu fûr leh ṭhála zawh theih tura siam te, kum 2012-13 - 2016-17 chhungin RKVY hnuaia km. 773 laihte a ni a; kum 10 chhunga link road laih zawng zawng belhkhawm chu km. 1,591 a ni.

KS Thanga chuan, Mizoramah buh her khawl lian (rice mill) lian tham tak din tuma hmalak a ni tih a sawi a, "NEDP aṭangin sum dah a ni a, cheng nuai 50 senna tur niin, quotation koh mek a ni," a ti.

Irrigation & Water Resources (IWR) minister ni bawk KS Thanga chuan, IWR department-in ram hectare 622-a zau châwm tur irrigation project thawh mek 12 an nei a, hectare 1,33,000-a zau châwm tur project dang 26 thawh ṭan tum a ni bawk tih a sawi a; National Hydrology Project kalpui a nih bakah, JICA (Japan) sum hmangin JICA nen thawhho mek a nih thu a sawi bawk.