KHAWTHLIR
Journalist thi
Aizawl aṭanga ni tin chhuak chanchinbu, National Observer editor Sangsuakthanga (47) s/o Laltama chu nimin chhun dar 12:42 khan Synod Hospital-ah a thi a, a ruang hi an khua, Chawngte-P ah lak a ni. Sangsuakthanga hi Bawngkawn, Durtlang road chunga an in kawt aṭangin January 13 khan a lum a, a hliam tuar loin nimin khan a thi ta a ni.
Foreigner endikna
Lunglei SP chuan thupek chhuahin, Foreigners Order, 1948 Section 3(1)(a) leh Section 5 (1)(a)-in thuneihna a pek angin, Kawrpuichhuah Land Check Post chu dan loa India rama luh tumte endikna, Authorized Immigration Check Post-ah a puang.
Home tanpui
Mizoram Rural Bank chuan financial year kum 2017-18 chhunga corporate social responsibility hmalakna kal zelah Baptist Church Orphanage, Serkawn, Lunglei hnenah January 17 tlai khan motor (Eeco van) an pe a; MRB chairman Gautam Sengupta-a'n a hlan.
Eng awm dawn lo
Power & Electricity department chuan, naktuk Inrinni hian Zuangtuia 132 KV sub-station an thawm ṭha dawn a; zing dar 7 aṭanga tlai dar 4 thleng Zuangtui sub-station-in a châwmte'n kawlphetha an hmu thei dawn lo tih sawiin, mipui hriatthiamna an ngen.
Pump khâr dawn
All Mizoram Petroleum Dealer Association (AMPEDA) chuan, naktuk Inrinni hian an pawl din champha lawm pahin training an nei dawn a, Mizorama petrol pump zawng zawng khar a ni dawn. AMPEDA chuan mipui hriatthiamna an ngen a ni.
PIL ni lo
Lalhriatrenga Chhangte-in chief minister Lal Thanhawla laka thubuai a thehluh thu Vanglaini, January 18-a tarlan kha PIL ni loin criminal complaint tih zawk tur a ni e.