Smart city zir turin USA-ah AMC Councillor pahnih

January 17, Nialini aṭang khan University Center, Chicago, USA-ah khawvel huapin smart city zirhona neih a ni a, January 20, Inrinni thleng neih a ni ang.

He programme-ah hian khawvela khawpui enkawltute an tel a, Aizawl Municipal Corpo­ration (AMC) aiawhin coun­cillor pahnih Laltlan­zova Khiangte leh Rosiam­ngheta te an tel.

Chicago-a Annual Smart City Symposium and Exhibition-ah hian khawvel hmun hrang hranga mi thiamte'n khawpui enkawltute khawpui enkawl dan an zirtir a; khawpui hrang hrang mayor-te'n thu sawiin, an tawnhriatte leh khawpui changkanna atana zir tur nia an hriatte an sawi.

AMC Ward-IV bialtu Lal­tlanzova Khiangte chuan, smart city zirhonaa tel tur hian sawmna an dawn thu sawiin, AMC-in inzir belh zel a duh vangin aiawh an intir tih a sawi a, "Aizawlah Smart City nei turin AMC chauh beisei chi a nih hmel loh a, Mizoram sorkar leh mipui náwlpui nena ṭanho a, hmasawnna kan ngaihna laite zirhoa kan zavaia ṭan a ṭulin a lang," a ti.

Tlanzova chuan, smart city zirhonaah hian khawpui changkang nei turin power supply ṭha (smart energy), in sak dan awmze nei (smart buildings), kawng ṭha leh vantlang mamawh hmasawnna dang ṭha (smart roads and infra­structure), lirthei leh a tlan dan kalphung awmze nei (smart transportation)-te chu an zirho tlangpui a nih thu a sawi.

AMC Ward-V bialtu Ro-siam­ngheta chuan, khawvela khawpui changkang tawhte chuan smart city nei turin hun rei tak aṭangin hma an la a, an hmasawnna pawh a kal thui hle tawh tih a sawi a, "Keini erawh chuan bul kan ṭan dawn chauh avangin kan rilrute hmasawn turin inbuatsaih hmasak a ṭul a ni," a ti.