Energy renchemna tur ruahmanna zirho

Power & Electricity department chuan, energy renchem a nih theihna tura ruahman, sumdawnna in (building), connected load kilowatt 40 chin chung lam sak dan phung duanna, Energy Conservation Building Code (ECBC) chungchang zirhona nimin khan Aijal Club-ah an buatsaih a, minister PC Lalthanliana'n a hmanpui.

PC Lalthanliana chuan, "Kan ramah solar energy tam zawk dek chhuaka kan hman tam a ṭul. Renewable energy siamna kawngah sorkarin theihtawpin hma a la ni," a ti a; hmun hrang hrang­ah ni zung hmanga kawlphetha siam pe chhuak thei tur bun tura hmalak mek a nih thu a sawi.

Seminar hi P&E secretary H Laleng­mawia'n a kaihruai a, sorkar department hrang hranga engineer leh architect-te bakah Aizawl Municipal Council, Mizoram University leh private consultancy firm aiawhte an tel. All India Institute of Local Self Government (AIILSG) master trainer Kanagraj Ganesan-a'n ECBC chungchang a lem nen a sawifiah.

Sorkar laipui chuan ECBC a siam a, state zawng zawngte'n an state sik leh sá mila ECBC nei vek turin a ti a; tun dinhmunah state 10 leh union territory pakhatin anmahni pualin ECBC an nei tawh a ni.

Mizoram pawhin ECBC neih ngei tumin All India Institute of Local Self Government, New Delhi nen ṭangkawpin hmalak mek a ni a, Mizoram ECBC duan chhinna (draft) pawh siam tawh a ni.