Kuthnathawktute Ni hman dan MNF-in Kut hnathawktute zah lohnaah an ngai

MNF party ṭhalai, MNYF chuan thuchhuah siamin, Mizoram sorkarin January 14, 'Kuthna­thawktute Ni' atana a hmang ṭhin chu lawm­awm an tih thu an tarlang a, "Chutih rualin, NLUP fakmawina atana an hmang hi kut hnathawktute a zah lohthlak kan ti hle," an ti.

MNYF chuan, January 14, 2011-ah Aizawl leh district khawpui dangah nasa takin NLUP hawnna buatsaih a ni a, chutah chuan chief minister Lal Thanhawla'n kum tin January 14 chu Kuthnathawktute Ni atan hman ziah a nih tur thu a sawi tih an tarlang a; mahse, kum 2012-ah sorkarin a hman âwm an hriat loh thu leh kumin 2018-ah pawh tun thlenga hman a la nih loh thu an sawi.

Congress sorkarin NLUP fakmawina atana Kuthnathawktute Ni an hmang ṭhin chu kut hnathawktute zah lohnaa an ngaih thu sawiin MNYF chuan, "Congress sorkar hian kum 2013-2016 chhunga Kuthnathawktute Ni an hmanah uar takin NLUP an sawi mawi char char a, kum 2017-a a ni sawn hlat a nih pawh khan sorkarin Aizawla officer awm zawng zawng kokhawmin, Lal Thanhawla Auditorium-ah kut hnathawk zawkte awm loin sorkar hnathawk officer-te hnenah NLUP fakmawina an sawi khum chiam a ni," an ti.

MNF ṭhalaite chuan, Kuthnathawktute Ni hman chu kut hnathawktute hmangaih vang nia an ngaih loh thu sawiin, "Kumina hman a ni lo pawh hi Comp­troller and Auditor General of India report 2016-in NLUP hlawhchham let dêra a tarlan vanga hmang ngam tawh loah kan ngai," an ti. Mizoram sorkar chu kut hna­thawktute harsatna sukiang turin an sawhthing tharte leisak turin an phût bawk.