Lokayukta din thuai duh

PRISM party chuan thuchhuah siamin, eirukna chu Mizoram hmasawnna dâltu ber a nih thu leh eirukna tihbo a nih theih nan Lokayukta ha hriam tak nei din thuai a ṭul thu an tarlang.

Sorkarna chelh mektu Congress party-in kum 2008 inthlanpuia election manifesto no. 1-ah Vigilance Commission din an tiam tih sawiin PRISM chuan, "Kum 5 an sorkar chhungin an din lo tluan ṭhak a. Kum 2013 inthlanpuiah Lokayukta din an tiam leh a, tun thlengin an la din lo," an ti a; Congress sorkar chu eirukna haw tak tak loah an puh.

PRISM chuan, kum 2016-17 budget-ah Lokayuk­ta din nan cheng nuai 159.34 dah ni mah se, an din lo a, kumin 2017-18 pawh hian Lokayukta din nan nuai 159.34 bawk dah leh ni mah se, tun thlengin an la din chuang lo tih an sawi a, "Hei hian eirukna an huat tak tak lohzia leh Lokayukta din tak tak an tum lohzia a tilang chiang tâwk hleah kan ngai. Kum hnih chhunga Lokayukta dinna tura an sum dah hi khawiah nge a awm? Chhuanlam siam reng loin Lokayukta din nghal mai rawh se," an ti.