Garage nei tura hriattirna bawhzuiin Local council 26 enfiah a ni tawh

Mizoram sorkarin Aizawla lirthei nei zawng zawngte a dahna garage nei vek tura a tihna thupek chu bawhzui zel a ni a; thuneitute'n garage nei loa vantlang kawngpuia zana lirthei riah an awm leh awm loh local council (LC) 26-ah thuneitute'n an enfiah tawh. Hetih lai hian, Aizawla LC 83 zinga 26 chuan an venga garage nei leh nei lo an enfiahna report an la thehlut lo.

Traffic SP C Lalthanmawia chuan Vanglaini palai zawhna chhangin, lirthei neite'n garage an neih nana sorkarin hun a pek chu November 2017-a a tawp hnuah, December 1, 2017 zan aṭangin enfiah hna ṭan a nih thu a sawi a, "Chawlhkar khatah zan hnihte kan chhuak a, kan enfiah hnuhnung ber chu December 22 zanah a ni a, tun karah kan chhunzawm leh ang," a ti a; a huhoa feh chhuah pangngai ni loah pawh, report an dawn emaw, an hmuh fuhte chu an man zeuh zeuh fo thu a sawi.

Traffic police aṭanga thu dawn danin, Aizawla lirthei neitu zawng zawng garage nei vek tura sorkarin a hriattirnaah LC tinte chu an veng chhunga lirthei awm zat leh garage an neih leh neih loh chhinchhiah a, an report chu Traffic Police-ah thehlut tura tih an ni a; chumi ang chuan Aizawla LC 83 zinga 57-in report an thehlut tawh a, LC 26 erawh chuan tun thleng an la thehlut lo thung.

Traffic hotute chuan, report la thehlut lo LC-te chu a rang lama hm ala tura ngenna pek an nih thu an sawi a; garage chungchanga sorkar hmalakna chu khauh taka kenkawh chhunzawm zel a nih tur thu leh, LC-in garage neite hnena certificate an pek pawh endik zel a nih thu an sawi.

Coordination Committee on Traffic Management hnuaia garage chungchang bawhzuitu Committee chuan January 2018 chhungin veng hrang hrangah zan li endika thawh chhuah an tum a; kumina a vawi khat nan nizanah emaw, zaninah emaw enfiah hna thawh an tum a ni.