Rahpuah bomb vangin thi

January 18, Ningani zing dar 8 vel khan Lawngtlai aṭanga khawthlang lama Kawnkhaw mi Khusoma (37) w/o Nbauh Krauhha chuan rahpuah bomb a rap a, na taka hliamin, nimin zing dar 9:30 vel khan a hliam tuar loin a thi.

Lawngtlai aṭanga thu dawn danin, Kawnkhua hi Parva leh Tuisentlang inkara awm a ni a; Khusoma hi an loah hmarcha la tura a kalnaah rahpuah bomb rap puakin, a kâwng hnuai lam zawng bomb-in a thlawh darh a ni.

Tun hnaiah Myanmar Army leh Arakan Army-te inkah avangin ramri hnaiah awm khuate an rálmuang lo hle a, tawhsual tâwk pawh an awm zeuh zeuh a ni.

November 2017 khan Tuichawtlang khaw mi Robichondro (20) chu silaiin kah fuh a ni a, January 12, 2018-ah Sabualtlang khaw mi Monodo (67) chu Myanmar sipaite'n hel emaw tiin an kah fuh bawk. January 15, 2018 pawh khan zing dar 8 velah Jitua Tongchangya (26), Burduk­­banga, Lawngtlai district-in chawhmeh zawnga an ramkalnaah bomb a rap puak bawk a, hliam tuarin, damdawi-inah enkawl a ni.