CM laka criminal complaint thehluttuin A thehluh chhante press-ah a sawifiah

Chief minister Lal Thanhawla'n kum 2013 Assembly inthlan dawnah affidavit dik lo a thehluta puha Serchhip District Court-a criminal complaint thehluttu Lal Hriatrenga Chhangte chuan nimin khan Aizawl Press Club-ah thuthar thehdarhtute a kâwm a; CM Lal Thanhawla'n affidavit dik lo a thehlut nia a hriat dan a sawifiah.

Lal Hriatrenga Chhangte hian CM Lal Thanhawla chu kum 2013-a inthlan dawna affidavit a thehluhah dawt chi hnih ziakah a puh a; chungte chu - New Town, Kolkata-a in hmun a neih thu a tarlan loh chungchang leh a kum dik tak ziah loa puhna a ni.

Lal Hriatrenga Chhangte sawi danin, November 7, 2017-ah Bidhannagar Municipal Corporation-ah New Town AI-178 ram chu sorkar record-ah tu ram nge tih chu a zawt a, BMC chuan New Town area chu HIDCO huam chhung a nih avangin HIDCO-ah zawtfiah turin an lo ti a; HIDCO hotute'n West Bengal sorkara Registrar of Land Records, Rajarhat-ah zawtfiah turin an lo ràwn leh a ni. Registrar of Land Records office-ah a zawhfiah leh a, anni chuan a hriat duh angte duh angte an lo hrilh.

Registrar of Land Records-in an lo hrilh danin, New Town AI-178 ram chu Lal Thanhawla hmingin August 30, 2013-ah dah a ni a, August 30-ah hian sale deed ziah luh a ni. Document copy-te pawh November 8, 2017-ah an pe chhuak a ni. Hriata Chhangte chuan, "August 30, 2013 aṭang hi chuan a chuha chuh buai theih hauh loin plot no. AI-178, New Town ram leh building sak mek Pu Hawla, Mizoram CM ta ngei a ni tih ka chiang ta a ni," a ti.

Lal Hriatrenga Chhangte chuan, August 30, 2013-ah New Town-a AI-178 ram chu CM Lal Thanhawla ta a nih tawh laiin, kum 2013-a Assembly inthlanna tura November 8, 2013-a Serchhipa nomination a file-a a rosum neih affidavit hmanga puanah New Town-a a ram neih thu tarlan a ni lo tih a sawi a; chu chu Representation of People Act Section 125-A bawhchhiatna a nih thu a sawi a ni.

Affidavit-a thil dik lo ziah chu dâwt sawi dan pawi ber a nia sawiin Hriata Chhangte chuan, "CM berin Election Commission of India (ECI) leh Mizoram mipui, a bikin Serchhip bial a bum duh hi a zialo ka ti hle. Hun lo la kal leh zel turah amah Pu Hawla bakah, MLA ni mekte leh nih tumte fimkhur zawk nan Chief Election Commissioner-ah December 13, 2017 khan complaint ka thlen a ni," a ti.

Lal Hriatrenga Chhangte chuan, CM Lal Thanhawla hian inthlan dawna affidavit a thehluhah a kum zat a dik loin a ziak ṭhin niin a sawi bawk. A sawi danin, Lal Thanhawla chu kum 2003 inthlanah kum 57 a ni a, kum 2008-ah kum 68, kum 2013-ah kum 71 tiin a inziak a ni.

ECI-a complaint a thehluh chungchanga zawhna chhangin Hriata Chhangte chuan, a thu thehluh ang chi chu ECI-in kum 2014 aṭangin an khawih ngai tawh lo niin a sawi a, "ECI-in min ràwn angin law court-ah, amah Pu Hawla thil sual tihna hmunah ngei, Serchhip district-a Chief Judicial Magistrate hnenah January 17, 2018 khan case kan file fel ta a ni," a ti.

CM Lal Thanhawla laka complaint a thehluh chu mimala a huat vang emaw, politics-a inbeihna emaw a ni lo tih sawiin Hriata Chhangte chuan, "Politics-a Pu hawla beihna feeling ka nei lo, kei pawhin hmanah ka vote tawh," a ti a; Lal Thanhawla chu Assembly inthlanah candidate ni thei tawh loh se tih chu a duh dan a nih loh thu leh, a duh chu CM berin dâwt a sawi ṭhin tih mipuiin hria se tih a nih thu a sawi.

Lal Hriatrenga Chhangte hi Indian Bureau of Mines, Kolkata-a deputy controller of mines hna thawk mek a ni a; sorkar hnathawk a ni chunga press conference a koh chungchanga zawhna chhangin, "CCS Rules-in min phuar a, mahse, kan pute hnenah ka dil lo a, ka risk tawp mai a ni," a ti a; a press conference neih chu an pute'n an hriat leh ngei a rin thu leh, pawi a tih loh thu a sawi bawk.