HSLC leh HSSLC topper-te CM Award hlan

High School Leaving Certificate leh Higher Secondary School Leaving Certificate Examination 2021-a topper-te chawimawina hun nimin khan School Education conference hall-ah hman a ni a, Chief Minister's Award hlan an ni.

Khuallian chief minister Zoramthanga chuan, "India ram state zinga board exam pangngai taka nei thei awm chhun kan ni hi thil ropui tak a ni a, Education Minister leh department thawktu zawng zawng, nu leh pa leh zirtirtu leh zirlai zawng zawngte tih hram hramna leh thawhrimnaah lawmthu ka sawi a ni," a ti.

School Education minister Lalchhandama Ralte chuan, Covid-19 avanga harsatna tuar nasa ber department zinga mi an nih thu sawiin, "Harsatna chhâwk zângkhai turin remchanna dap zel a ni. Rualkhai zawka zirna kalpui a nih theih nan ruahmanna thar siam a ni a, zirtirtute chu sikula kal tawh turin kan ti a ni," a ti.

CM Award dawngtute chu pakhatna ṭheuhte an ni a; HSLC-a pakhatna Lalnunmawia s/o RL Chanchinmawia, Durtlang North (St. Joseph HSS), HSSLC Arts-ah Sylvia Lalhmingmawii d/o C Thanga, Tuikual South (Oikos HSS), Commerce-ah C Lalrintluangi d/o C Lalduhawma, Serchhip P&E Veng (Oikos HSS) leh Science-ah Lalengzauva s/o Lalṭhakima, Ramhlun South (St. Paul's HSS)-te an ni. Thuchei leh Rs. 50,000 ṭheuh hlan an ni.