Mizoram leh Assam CS-te an inbia Ramri chungchangah an inrem thei lo

Mizoram chief secretary Lalnunmawia Chuaungo leh Assam chief secretary Jishnu Barua te chu state pahnihin ramri buai an neih chungchangah nimin khan Gujarat Bhavan, Delhi-ah an inbia a; inremna an siam thei lo.

Sorkar thuchhuah tarlan danin, inbiaknaah hian Mizoram Chief Secretary chuan, state pahnih ramri hrûlah harsatna awm loin kum za chuang Mizote'n lo neiin an enkawl tawh ṭhin tih a sawi a; Mizoram sorkar leh mipui aiawhin Assam sorkar chu Vairengte ram chhung Aitlanga June 29, 2021 aṭanga Assam police inkulh mekte chu a rang thei ang bera hnûk lêt tur leh loneitute thlai leh thlám an tihchhiatsakte hnenah zangnadawmna pe turin a ngen.

Lalnunmawia Chuaungo chuan, Assam sorkar chu Mizo loneitute thlai leh bungruate tichhe tura armed police leh sorkar official-te an tirh tawh loh a beisei thu sawiin, "Hei hi Assam Chief Minister-in June 27, 2021-a Mizoram Chief Minister hnena lehkha a thawna state pahnihte inngeih taka an awm theih a beisei thu a ziah tihhlawhtlinna kawng pawimawh tak a ni," a ti a; police chakna hmang loa dawhkan kîla ramri buai chungchang ṭha taka chinfel a pawimawh thu a sawi.

Mizoram Chief Secretary chuan, June 29, 2021-a Mizoram CM telephone-a biain, ramri buaina felfai taka chinfel theih a nih hma chuan May 10, 2021-a Assam CM atana lak luh a nih laia ramri dinhmun ang (status quo)-a awm rih a duh thu a lo hrilh tawh tih a sawi a, "Mizoram CM pawhin chu chu a duh dan a nih thu Assam CM a lo hrilh a, hei hi state pahnih indawr chhunzawm zelna atana boruak ṭha siamtu tur a ni," a ti.

State pahnih chief secretary-te hian inremna an siam thei lo a, an pahniha an inbiak zawha Union Home Secretary Ajay Kumar Bhalla hoa meeting an neih lehah pawh an ngaihdan leh duh dan a inmil theih loh avangin state sorkar thuneitu sang zawkte ráwn ve ve a, hmalak zel dan tur ngaihtuah ni se, an ti a ni.