Delta Variant bak Covid chi thar Mizoramah a awm tawh rin a ni
Integrated Disease Surveillance Programme (IDSP) state nodal officer leh Covid-19 thupuangtu Dr Pachuau Lalmalsawma chuan, Mizoramah Covid-19 chi thar finfiah tawh Delta Variant B.1.617.2 ni lo Covid-19 chi thar a awm tawh ngei an rin thu a sawi a, "Finfiahna erawh a la awm lo," a ti.
Vanglaini palai zawhna chhangin Dr Pachuau Lalmalsawma chuan, Mizoramah Covid-19 Delta Variant B.1.617.2 a awm tih finfiah a nih hnuah swab sample 100 dang National Institute of Biomedical Genomics (NIBMG), West Bengal-ah an thawn leh tawh thu a sawi a, "Result kan la dawng lo. Hei bakah pawh hian a hmaa sample kan thawn tawh result dawn loh kan la nei," tiin, sample 426 an thawn tawh thu a sawi.
IDSP Nodal Officer chuan, finfiahna la awm lo mah se, Delta Variant ni lo Covid-19 chi thar Mizoramah a awm ngei an rin thu sawiin, "Inkai awlsam dan leh a kaitea a thawh dan thlirin a awm ngei kan ring a, finfiahna a awm loh avangin a awm ngei kan ti ngam lo thung. Covid-19 thawh hnihna thlenna hmunah a chi thar a awm zel a, chu'ng aṭanga kai chhâwng kan nih vangin a rawn thlen loh bik a rinawm loh," a ti.
Covid-19 spokeperson sawi danin, Mizoramah Delta variant hmuh chhuah ni tawh mah se, swab sample an thawn result an hmuh tawh aṭanga a lan dan chuan, Mizorama Covid-19 vei tam berte chu a chi thar ni lo vei an ni.
Tarlan tawh angin, June 18, 2021 khan IDSP Nodal Officer hian Mizoramah Covid-19 chi thar Delta Variant B.1.617.2 vei mipa pali hmuh a ni tawh tih a puang a; chu'ng mi palite chu kum 18-45 inkar an ni a, an dam vek tawh thung.