July 12-ah zirtirtute sikul kal ṭan dawn : Hripui vei awm lohnaah sikul kal ṭan dil
Ṭha zawka online/offline hmanga zirna kalpui a nih theih nan Mizoram sorkar chuan July 12, 2021 aṭangin sikul a hawng dawn a, zirtirtute chauh sikulah an kal rih dawn. Hetih lai hian, School Education department chuan hripui vei awm lohna khuaahte sikul kal phalsak tawh tura ngenna nimin khan State Executive Committee (SEC) hnenah an thlen.
Vanglaini palai zawhna chhangin School Education minister Lalchhandama Ralte chuan, Covid-19 vei awm lohna hmuna sikul kal phal tura ngenna SEC hnenah an thlen thu a sawi a, "DC leh task force-te'n rem an tih chuan hri kai awm lohna khuaahte sikul kal ṭan leh turin kan inpeih tih kan hriattir. Online class hi chhawr thei lo tam tak an awm a ni," a ti.
School Education director James Lalrinchhana chuan sikul hawn chungchangah thuchhuah siamin, Covid-19 léng kara zirna kalpui chhunzawm dan tur inkaihhruaina 'Guidelines for Education during prevalence of COVID-19 pandemic' chu July 12, 2021 aṭanga hman tur a nih thu a tarlang a, "Online/offline hmanga zirtirna pek chhuah chu ngawrh taka kalpui tur a ni," a ti.
Sikul hawn tur puala inkaihhruaina siama tarlan danin, online/offline-a zirna kalpui tur hian zirlai tel loin sikul principal/headmaster/zirtirtute leh thawktu dangte chu an sikulah ṭheuh awm tura beisei an ni. Hei hian mimal, kohhran leh NGO enkawl sikul zawng zawng a huam. Zirlai tel loa sikul hawn leh kaihhruaina tihhlawhtlinna turah Covid-19 dona atana sorkarin dan leh khuahkhirhna a siam kalha hmalak phal a ni lo.
Inkaihhruaina chuan, "He zirtirna dan thar (online zirtirna) hlawhtling tur chuan nu leh pa, khawtlang hruaitute leh tlawmngai pawl hrang hrangte'n mumal taka ruahmanna an siam a, an thlithlaipui a, an ṭanho a ngai. Zirtirtu leh nu leh pate'n rilru inhawng taka he zir dan thar hi an pawm a, a taka kalpui thei tura an lo inpeih a pawimawh," a ti.
Sikul ṭhenkhat, quarantine centre atana hmanah chuan sikulah zirtirtute an kal dawn lo a, DEO/SDEO leh headmaster-te'n ruahmanna siamin, zirtirtute an kal khawm theihna hmun tur an ngaihtuah dawn a ni. Primary school zirtirtute chu chawlhkar khatah ni hnih tal sikula kal tura tih an ni a; middle school, high school leh higher secondary school-te chu ni thum tal kal tura tih an ni bawk.
