ZLP-in ram himna tur leh ramria Sorkar hmalakna beitham an ti

ZPM Legislature Party (ZLP) member-te July 8, Ningania ṭhukhawm chuan, Mizoram chhanhim tur leh ramri humhalh kawnga Mizoram sorkar hmalakna chu beitham an tih thu an tarlang.

ZLP thuchhuah chuan, ramri buai chinfel dan hria inti sorkarin ramri buai chinfel dan turah tihngaihna a hre lo lutuk chu pawi an tih thu leh, harsatna kara Vairengte khawtlang leh an hruaitute hmalakna chu fakawm an tih thu a tarlang a ni.

Tun hnai lawkah Mizoram chhungah Assam sorkarin a sipaite a rawn tír ta tih sawiin ZLP chuan, "Lo nawr lêt tura beitham taka hmalakna a awm hi pawi kan ti a, kan ram chhanhim tura kan sipaite thuam an nih dan phei hi chu zahthlak kan ti tak zet a ni," an ti.

ZLP chuan, Mizoram sipai (police)-te chu an awmna aṭangin chaw ei turin km. 4 vela thui an kal a ngaih bakah, an duty-na hmunah bungrua mumal an neih loh laiin, Assam lam chuan an sipaite chu generator leh thil ṭha tam tak nen an thuam tih an sawi a, "Hei hian kan sorkar rilru a hriat theih. An duhna lama sum sèn an hreh loh em em laia kan sipaite’n an phu tâwk anga ngaihsakna an dawng lo hi kan dem hle a ni," an ti a; ramri vengtute chu bungrua leh hmanraw ṭha pe turin Mizoram sorkar an ngen.

"Assembly session leh mipui punkhawmnaa ṭawngka chauha an thlavâng hauh leh sum tamzia sawi vak vak lo hian, a taka thil tihin, budget-ah leh anmahni thlamuan tura pên chhuak chunga an thlavang hi hauh ve tawh turin kan sorkar hi kan ngen tak zet a ni," an ti bawk.