Covid-19: Inzirtirna uar zawka kalpui rél

Health minister Dr R Lalthangliana kaihhruaiin nimin khan Secretariat confe­rence hall-ah sorkar leh pawl hrang hrang hotute'n Covid-19 vaccine pek dan leh hripui leng dinhmun an sawiho a; hripui inkai darh lo tura inzirtirna uar zawka kalpui an rél.

Covid-19 inkai darh lo tura inzirtirna uar zawka kalpuina atan electronic media-te ṭangkai lehzuala hman a ṭul thu sawi a ni a; containment zone-ah tun aia awmze nei zawka swab sample endik a nih theih dan tur sawiho a ni.

Ṭhutkhawma tarlan danin, Mizoramah July 8, Ningani thlengin Covid-19 vaccine dose 6,44,739 pek a ni tawh a, chu'ng zinga mi 78,006 chu dawng kim tawh an ni. Mizoram electoral roll thar ber angin Mizoramah kum 18 chung lam vaccine pek theih mi nuai 7.75 an awm a, chuta ṭanga chhûtin vaccine first dose la tawh 73% an awm a, first dose la tawh aṭanga chhûtin full dose la tawh 40% an awm bawk.

July 2021 chhunga vaccine second dose pek ngai zat chu mi 1,60,720 an ni a, vaccine dah khawl sa a awm ṭha a, nau paite hnenah July 12, Ṭhawhṭanni aṭangin vaccine pek ṭan a ni ang.

July 1-7, 2021 chhunga Covid-19 vei hmuh chhuah 2,212 zinga a tam ber chu in chhung khura inkài chhâwng an ni a, ṭhenawmte nena intlawhpawh leh ṭhian/lainate nena intlawh tawn aṭanga kaite'n an dawt.

Health department-in district a ṭhen angin Covid-19 vaccine hi Aizawl West-ah 93%, Aizawl East-ah 92%, Serchhipah 79%, Lungleiah 69%, Kolasib-ah 67%, Siahaah 67%, Mamitah 55% leh Lawngtlai district-ah 35% pek a ni tawh.

Mizoramah khum 2,737 awmna CCC 55, khum 5,099 awmna CCCC 243 leh khum 41 awmna paid CCC pahnih a awm mek.

Ṭhutkhawmah hian DMR minister Lalchamliana, MOT chairman Dr ZR Thiamsanga, Aizawl mayor Lalrinenga Sailo, sorkar official, IMA, Medical Operational Team, Joint NGO Coordination Committee, Mizoram Kohhran Hruaitute Committee leh local task force aiawhte an tel a ni.