Electric bill siam dan endik phût

Mizoram Pradesh Congress Committee chuan thuchhuah siamin, Power & Electricity department bill siam dan endik an phût thu an tarlang.

MPCC chuan, PE department-in metre reading ti loin, July 2021 electric bill an siam danah thil fel lo tak a awma an hriat thu sawiin, "July thla bill hi thla kal tate aiin nasa takin a tam a, chhungkaw tam takin lockdown vanga sum an thawh chhuah theih loh laiin an êng chhit ṭhin man aia tam daih an chawi a ngai dawn. Mipui lungawina ngei tura a chhan dik tak sawifiah turin Mizoram sorkar kan phût a ni," an ti.

Electric hman man bill thar ber chu Whatsapp group hrang hranga thehdarh theih turin PDF file-a siam a ni tih sawiin MPCC chuan, "PE department hian thla thum chhung bill pekna khaikhawm (average) aṭanga bill thar hi siam angin thuthang awm mah se, official-in hetiang thuchhuah hi tun thlengin a la awm lo," an ti a; bill chu mipui hnenah online-a pe tura hriattir mek an nih thu an sawi.

Congress party chuan, Covid-19 avanga hun rei tak lockdown chhung leh mipui sum lak luhin tlakhniam lam a pan mek laia mipui rawk zawnga Mizoram sorkar a khawsa ṭhin chu ṭha lo an tih thu an sawi a, "Sum lak luhna tlakhniam avanga bill pe thei lote ngaihhnathiam zawk turin Mizoram sorkar kan phût tlat a ni," an ti.