Kolasib-ah khauh zual dawn - Kolasib DC

Kolasib DC Dr H Lalthlangliana chuan nimin khan a pisaah thuthar thehdarhtute a kâwm a; Covid-19 inkaihhruaina chu Kolasib khaw chhungah khauh lehzuala kalpui a ni dawn tih a sawi.

Dr H Lalthlangliana chuan, ni thum liam ta aṭanga chhûtin hripui vei thar dinhmunin ziaawm lam a pan anga ngaih theih a nih thu a sawi a, "Hri léng dona leh inenkawlna kawngah pawh kan district-in hma a sawn zel. Kolasib khaw chhungah khauh lehzualin invenhimna kalpui a ni tawh dawn. Thupek thar chhuah angin magistrate leh VTF-te phalna nei lo chu páwna chhuah phal a ni tawh dawn lo," a ti.

Total lockdown neih rawtna eng emaw zat a luh thu sawiin Kolasib DC chuan, "Inkhàrkhipna hi mi harsa leh chanhaite phurrit belhchhahna a nih theih avangin tun dinhmunah chuan total lockdown hi kalpui tum a ni rih lo," a ti .