LLTF Visiting Team an che chhuak mek
Aizawl khawpui veng hrang hranga local task force-te tlawh chhuak tura Health Minister ruahman anga Aizawl DC-in a din Visiting team chuan July 1, 2021 aṭangin hma an la ṭan a, Aizawla LTF 83-te tlawh chhuah tumin an che chhuak mek.
Visiting Team hi community covid care centre (CCCC) dinna kawnga LTF hmalakna leh inpekna te, sorkar an ṭawiawmna leh mipui phurrit nasa taka chhâwktu an nih avanga lawmthu sawi tur leh, LTF harsatna ngaihthla a, a ṭul anga Covid-19 dona chungchang sawipui tura din a ni a; mi 25 awmin, hlâwm (team) pali-ah an insiam a, Aizawl khawpui chu zone 10-ah ṭhenin an tlawh mek a ni.
LLTF Visit Team hian veng hrang hranga LTF-te hnenah lawmthu an sawi rualin, an thu kente an hrilh ṭhin a; an tlawh chhuah hnuah sorkar hotute hnenah report an pe leh dawn a ni.
LLTF Visit Team thu kente
• Sorkar thuchhuahte ngai pawimawh hrâm hrâm tur te, sorkarin containment zone puan ṭula a hriat hunah puang hreh lo tur leh puan chin tawhah an harsatna tawhte hriatpui.
• Mipuiin nunphung dik ṭha taka an zawm theihna tura ṭan la tura ngen leh alcohol hmanga siam sanitiser chauh hmang tura hrilh.
• A tam thei ang bera mipui zirtirna neih leh social media hmanga thehdarh nasat lehzual.
• Sorkarin chawhmeh rate a bitukte uluk taka kenkawhpui tura ngen.
• Covid-19 vaccine lakna, chawhmeh bazar, swab sample lakna leh khawsakhonaah inhlata awm (physical distancing) kengkawh ṭha tura ngen.
• Covid-19 léng thawh thumna thleng thei avangin hmai tuamna, inhlata awm leh kut tihfai ṭhatte mahni inchhungkhur thlenga zâwm tura inzirtir.
• Harsatna an neihte ngaihthlaksak
• Ṭul dang awm apianga beng chhit leh che chhuak thei reng tura inkau.