MLA leh councillor-in ṭanpuina sem

Aizawl West-III bialtu MLA VL Zaithanzama chuan nimin khan a bial chhung veng hrang hranga local task force-te tlawhin, ṭanpuina sum leh Covid-19 Special Medi Pack 2021 a sem bakah, an harsatna tawhte a sawipui a; AMC Ward XIV councillor Ramthanzauvi'n a ṭawiawm.

VL Zaithanzama chuan, hripuiin kiam lam a pan thei lo a, veng hrang hrangah hripui vei an pun leh mek thu sawiin, mipui an zalen leh tâk deuh vang a nih theih thu a sawi a, "Inkhàrkhip hi mipuiin kan tlin lo tláng deuh tawh niin a lang a, sorkar pawhin Covid-19 dona kawngah ruahmanna thar a neih a ngai a ni," a ti. MLA hian Khatla South leh Khatla East-a CCCC-te a tlawh nghal bawk.

AMC Ward-VIII councillor Christina Roluahpuii Sailo chuan a bial chhunga Covid-19 vaccine pek mekah nimin khan chawchhun a sem a; Armed Veng, Armed Veng South leh Chite Venga vaccine pea thawk chhuak te, LTF-te leh executive duty-te hnenah ei tur a pe a ni. A bial chhunga hripui vei tamna ber Armed Veng South LTF hnenah Rs. 5,000 a pe bawk.