KHAWTHLIR

Thisen pe
KṬP, New Serchhip Bial chuan nimin khan Serchhip District Hospital-ah thisen unit 60 an pe a, petute hmeichhia 31 leh mipa 29 niin, blood bank-in thisen an mamawh nasat vanga pe an ni. Mizo Chelsea Supporters' Club pawhin Champions League-a Chelsea champion lawm nan nimin khan Aizawl Civil Hospital blood bank-ah thisen unit 35 an pe a, petute mipa 32 leh hmeichhia pathum an ni.

Nau paite tan DCHC
Mizoram sorkar chuan nau pai, Covid-19 veite enkawlna tur dedicated covid health centre (DCHC) atan ITI Urban Public Health Centre ruahman a nih thu a puang. Chawngte-L ah khum 41 awmna CCCC, New Siahaah khum 30 awmna, Saikao (Serkawr)-ah khum 26 awmna leh Phúrà khuaah khum 14 awmna CCC-te siam thar a ni bawk.

Thing tiak phun
Pachhunga University College-a NSS volunteer-te chuan nimin khan an plantation side, Ṭhiak ramah thing ṭiak an phun belh a, thing an phun tawhna hmunte an sâm fai bawk.

MSPCR member
Mizoram sorkar chuan Mizoram State Commission for Protection of Child Rights (MSPCR) chairperson atan Dr C Lalsangzuala, Armed Veng a ruat thar. He hna hi kum thum chhung emaw, kum 65 tlin thleng emaw a ni. Commission member atan J Malsawmzuala Vanchhawng, Dr Julie Remsangpuii Fambawl leh K Malsawmzuali te ruat an ni bawk a, anni hi ruat nawn vek an ni thung.

Zirlai chawimawi
Champhai Officers' Club (COC) chuan nimin khan IPR Auditorium-ah Champhai district-a tun hnaia zirnaa hlawhtlingte chawimawina hun an buatsaih a, Maria CT Zuali, bawrhsapin a hmanpui. HSSLC 2021-a top 10-a lang mi pathum hnenah thuchei leh Rs. 5,000 ṭheuh an hlan a, Mizo zinga Nephrology superspecialist hmasa ber Dr C Malsawmkima, Khuangleng hnenah lawmpuina an hlan bawk.

Buhfai khulsak
Deputy chief minister Tawnluia chuan nimin khan a biala AAY chhungkaw 668 leh PHH member 13,535-te July thla ration buhfai a khulsak. Buhfai hi AAY chhungkaw tan quintal 233.8 leh PHH tan quintal 676.75 a khulsak a, Rs. 2,73,165 man a ni.