Mizoramin cancer enkawlna khawl ṭha A neih theih nan hmalak zel a ni ang - Union Health Minister

Union Health minister Jagat Prakash chuan January 20, Inrinni khan Zemabawka Mizoram State Cancer Institute-ah Tertiary Care Cancer Centre (TCCC) sakna tur lungphûm a phúm a, Regional Institute of Paramedical & Nursing Sciences (RIPANS) Boys’ Hostel leh Library cum Examination Hall a hawng bawk. Minister chuan, Mizoramin cancer enkawlna hmanraw ṭha a neih theihna atan hmalak zel a tum thu a sawi.

Jagat Prakash chuan, Mizoram State Cancer Institute (MSCI)-a TCCC-ah hian khawl ṭha leh inenkawlna hmanrua ṭha zawkte dah a nih tur thu sawiin, "Mizoramin cancer enkawlna hmun ṭha leh hmanrua changkang ber berte a neih theih nan hmalak zel ka tum. Mizoramah company ṭha siam, cancer damdawi, implants leh damdawi dangte MRP rate aia 60-90%-a tlâwma hralhna Affordable Medicines & Reliable Implants for Treatment dawr hawn theih a nih thuai ka beisei," a ti.

India ramah, a bikin Mizoramah cancer a hluar lutuk chu pawi a tih thu sawiin Union Minister chuan, "Ram pumah kum tin cancer vangin mi nuai 6-7 an thi ṭhin. Cancer venna leh cancer veite a hma lama hmuh chhuah a, enkawlna ṭha an dawn theih nan sorkarin theihtawp a chhuah a. Ministry of Health & Family Welfare chuan ‘Free Universal Screening for Non-Communicable Diseases’ a din a ni," a ti a; Free Universal Screening for Non-Communicable Diseases hnuaiah hnute cancer, chhûl cancer, hrawk cancer, zunthlum, thisen sang leh a dangte kum 30 chin chung lam tan a thlawna enfiahtir (test) ṭhin a nih thu a sawi.

Union Health Minister sawi danin, Free Universal Screening for Non-Communicable Diseases hi India ram chhung district 100-ah kalpui a ni a, India hmarchhakah chuan district 23-ah kalpuiin, chu'ng zinga district pali chu Mizoram chhunga mi a ni.

Health minister Lal Thanzara pawhin thu sawiin, MSCI-a TCCC sak zawh a nih hunah chuan cancer enkawlna ṭha lehzual pek theih a nih tur thu a sawi a, "Khawl ṭha, linear accelerator order mek a ni a, kumin March/April-ah chuan hman ṭan theih beisei ,a ni," a ti.

Lal Thanzara chuan, medical college (MIMER) din a nih theihna atana chak taka hmalakpui tur te, Mizoram tana MBBS seat nikuma tihtlem chu tihtamsak leh turte leh, cheng vbc. 445.8 sênga RIPANS zauha tihchangtlun a, khum 100 awmna damdawi-in sakna tur chu pawm a nih tawh angin a rang thei ang bera hna thawh ṭan a nih theih nana hmalakpui turtein Union Health Minister a ngen a ni.

MSCI-a TCCC hi Ministry of Health & Family Welfare hnuaiah cheng vbc. 44.27 senga sak tur a ni a, khum 100 awmna tur a ni. Cancer zaina centre, intensive care unit (ICU), radiotherapy centre, simulator, brachytherapy, LINAC, 16-Slice CT scanner, ultrasound, bronchoscopy, digital mammography leh flow cytometer khawl-te dah tura ruahman a ni.