ZPM Caucus din thar a ni

Ṭangrual pawl, Zoram Peoples' Movement (ZPM) Steering Committee chuan an pawla tel pawl pangate thawhhona boruak ṭha siam tur leh tichaktu atan thuneihna sang tak nei ZPM Caucus an din.

ZPM Caucus-ah hian chairman leh secretary bakah member paruk an awm a, ZPM kal zel dan te, political affairs leh programme-te leh inthlan kaihhnawih thil ṭul pawimawhte thlir lâwkin, ZPM Steering Committee-ah an pawmpui turin rawtna an thlen ṭhin ang. ZPM chhunga thu lian tham leh khirhkhânte an lo thlir lâwk hmasa ṭhin dawn a, kumin kum tawp lama Assembly inthlan lo awm tura an candidate tur leh an bial vil turte pawh an ruat dawn a ni.

ZPM Caucus hi vawi khat ṭhukhawm tawhin, an pawl thuthlung pakhatna 'He Ṭangrual Pawl hi political party te, ram vei pawl hrang hrangte leh mimal tu pawh, Mizoram sorkar ṭha piantir duh apiangte tel theihna tura siam a ni a, Ṭangrual Pawl zawm duh tan, pawl ṭhiat kher lo pawhin zawm theih a ni' tih chu an pawm a; sorkar ṭha tun din duhtu ṭhahnemngai pawl hrang hrangte chu ZPM-a thawkho a, Ṭangrual Pawl zawm turin an sáwm.

ZPM Caucus-ah hian chairman chu Lalliansawta niin, secretary chu K Sap­danga a ni a; member-te chu - Rev. Darchungnunga, Lalduhoma, Lalhmangaiha Sailo, Vanlalhlana, Dr Kenneth Chawngliana leh H Zosiamliana te an ni.