Sorkarin department-te tihlen aiin privatisation uar zawk a tum - Lalsawta

AH&Vety farm, Then­zawla Pony Riding Entertainment (sakawr chunga chuanna) siam thar chu Inrinni khan hawn a ni a; a hawngtu Finance minister Lalsawta chuan, department-te tihlen aiin privatisation uar tum a nih thu a sawi.

Lalsawta chuan, Mizo­ram sorkarin thil tak tak a tih dawn chuan sorkar kut aṭang ni loin, mimal kut aṭanga hai chhuah a tum thu a sawi a, "Hei vang hian sorkar a inkuangkuah mai mai dawn tihna a ni lo. An mamawh inṭâwm mimal tana tih hautakte chu sorkarin a ngaihtuahsak dawn a ni. Sorkar chuan tum angin hma a sawn theih lo tih chiang tawh a, khawvel ram dang en pawhin a ni tho," a ti.

Finance Minister chuan, sorkarin ṭhalaite a ngai pawimawh nia sawiin, "Kan ṭhalaite'n intihhlimna hmun leh inlak thawvenna hmun ṭha an neih hi sorkar chuan ṭul a ti em em a, kan ṭhalaite hi keini ai chuan an pawimawh zawk zel a ni," a ti a; ṭhalaite'n hna an thawh hun chhung ni loa intihhlimna tur hmun an neih chu sorkar duh dan a nih thu a sawi.

Khualzahawm, AH & Vety minister C Ngunlian­chunga thu sawiin, de­partment-te tihlen ai chuan privatisation uar chu ṭha zawka a hriat thu a sawi a, "Department-te titêt zel a, chu chu mipuite chhawrtir a pawimawh. Mimalte chu department chu mimalte a ṭul ang an zirtir dawn a ni. Ram changkangah sorkar farm a awm ṭhup ṭhup ngai lo," a ti.

Ransaa intodelh tura hma an lak thu sawiin AH&Vety Minister chuan, "Kum 40 chhunga kan thlen chin chu tun dinhmun hi a ni a, kalphung thlak a ṭul. Ram páwn aṭanga la lut lo a, Mizoram chhunga thar chhuah dan kawng zawn a ngai," a ti a; ran lak luhna atan state páwna cheng tam tak luangral ṭhin chu tihtawp a nih theih nan theihtawp an chhuah niin a sawi.

Pony Riding Enter­tainment dinna atan hian cheng nuai 58 vel sên a ni a, Manipur aṭangin pony (sakawr tê chi) 10 lak luh a ni a; a duh apiang tan man chawiin sakawr chungah chuan theih a ni.