KHAWTHLIR

MBKHP tawngtai
Mizoram Baptist Kohhran Hmeichhe Pawl (MBKHP) Inkhawmpui vawi 50-na, February 1-4, 2018-a Lunglawn muala neih tur pualin nimin khan Spiritual Concern Committee chuan BCM Lunglawn pastor bial huapin ṭawngṭai hona hun an buatsaih. Ṭawngṭai inkhawm hi Upa R Liansanga'n kaihruaiin, MBKHP president F Lalrochami'n thuchah tâwi a sawi. MBKHP Inkhawmpui neihna tur pandal sak mek a ni a, tun dinhmunah 90% vel an sa zo tawh a; a sak nan cheng nuai 35 ruahman a ni.

Tuiah tla hlum
Nimin chawhma lam khan Lalnunnema (32) s/o Thantluangi (L), Electric Veng, Aizawl chu Tlawng luiah a tla hlum. Lalnunnema hi tuia a tlak hnu lawkah chhan tum a ni a, mahse an lak chhuah chuan a lo thi hman tawh a ni.

Thisen pe
Dawrpui Bial KṬP chuan an diamond jubilee lawm nan Inrinni khan Zarkawt Kohhran Hall-ah blood donation camp an huaihawt a, mipa 51 leh hmeichhia pangain Aizawl Civil Hospital tan thisen unit 56 an pe. Aizawl Civil Hospital-ah hian Inrinni vek khan Chhiahtlang Student Union-in thisen unit 17 leh Tlungvel Student Union-in unit 12 an pe a; individual voluntary donor mi 10 an awm bawk.

NCC camp
20 Mizoram NCC chuan January 10-19, 2018 chhung khan Tanhrilah Annual Combined Training Camp an nei a, college leh high school zirlai 409 an tel. Camp chhung hian silai kah, parade, map reading, cultural programme leh silai chi hrang hrang zirtir an ni.

Lirthei tlan hun
PWD, Hmuifang Division chuan Muallungthu-Khumtung kawng blacktop hna vawiin aṭangin an thawk dawn a, chak zawka hna thawh a nih theih nan Traffic SP C Lalthanmawia chuan lirthei tlân theih hun a siam. Hna thawh chhungin Thawhṭanni aṭanga Inrinni thleng zing 8 leh chhun dar 12 inkarah leh chawhnu dar 1 leh tlai dar 5 inkarah lirthei tlan phal a ni dawn lo a, chhun dar 12 leh dar 1 inkar hawn a ni ang. Pathianniah pawh zing dar 8 aṭanga tlai dar 5 thleng lirthei tlân phal a ni dawn lo.