Chhungkaw tam takin NLUP hmangin Eizawnna an nei mek zel - Zodintluanga

Minister Zodin­tluanga chuan kar kal ta khan a bial, Thorang chhunga khaw hrang hrang a tlawh a; vantlang inkhawma thu a sawinaah, chhungkaw tam takin NLUP hmangin eizawnna an neih mek thu a sawi.

Zodintluanga hian January 19, Zirtawpni khan Marpara community hall-a Soil & Water Conservation department-in hmunphiah thlangtute hnen­a NLUP phase 3 leh phase 4 hnuai­a ṭanpuina a semnaah thu sawiin, "Hmunphiah thlangtu chhungkaw tam takin eizawnna an nei thei ta hi NLUP hlawhtlinna lantirtu pakhat a ni," a ti.

Marpara khaw mipui­te chu a hma chuan Environment & Forest department hnuaiah mau chîn thlang tura tih vek an nih thu sawiin Zodintluanga chuan, a chîn chhunzawm lamah harsatna an tawh avangin SWC department hnuaia hmunphiah chinah a tam thei ang ber an inlet leh ta vek chu mipuiin hma an sawn phah thu a sawi.

Zodintluanga chuan, NLUP chu la sem zel a nih tur thu sawiin, "A tak takin NLUP hlawh­tlinna kan hmu a, thinlung leh tih tak takna nena hnathawk leh turin kan ngen a che u. NLUP kan thlan zinga la tel ve lote pawh kan la rawn pe zel dawn che u a ni," a ti.

Thorang bial chhung­a PMGSY leh NABARD hnuaia kawng siam tur tam tak hna chhuak chung­chang sawiin, "Con­tractor an lo lut tam dawn a, in lo ṭawiawm thiam a pawimawh dawn," a ti a; thawhhona ṭha tak nei tura lo inpuahchah lawk turin a chah.

Minister Zodintluanga hian January 16-19, 2018 chhung khan Marpara, New Sachan, Terabonia, Salmur, Sachan, Sumasumi, Tuikawi, Bunghmun, Sesawm leh Laisawral-te a tlawh a ni.