Mizoram Police din champha lawm a ni : Ram tana nunna hlan mi 56 an awm

Nimin khan Mizoram hmun hrang hrangah Mizoram Police kum 46 tlin champha lawm a ni. A lawmna pui ber Aizawlah chuan Police headquarters-a Arya Mess-ah inkhawm buatsaih a ni a, Mizorama SP hmasa ber F Lalremsiama, IPS (Rtd.) khuallian a ni. Inkhawmah hian Mizoram police, an duty laia ram tana nunna hlan (martar) 56 an awm tawh thu an tarlang.

F Lalremsiama chuan, hna atana police thlangtu chuan sipai huaisen leh rinawm tak nih a tum tur a nih thu sawiin, "Police hna hi hna hlauhawm tak a ni a, harsatna, a chhe ber lo thleng tura inbuatsaih lâwk tur a ni. Police, an duty laia ram tana nunna hlantute chu martar dik tak an ni," a ti a; khawvel hmasawn zelah police-te mawhphurhna a pun zel thu a sawi.

Mizoram Police-te'n an din champha puala souvenir an buatsaih chu F Lalremsiama hian a tlangzarh nghal a ni.

DGP Thianghlima Pachuau pawhin thu sawiin, "Mizoram police-te hi India rama police ṭha ber kan ni a, a ṭha ber ni zel turin theihtawp kan chhuah zel ang. Police hi a sang zawngin a ṭhang zel ang a, Mizoram râlmuanna hi vawng nung zel turin ṭan kan la zel dawn a ni," a ti.

Inkhawmah hian police chawi­mawina dawngtu hrang hrangte hnenah Mizo IPS (Rtd.)-te'n medal an hlan a ni.

AIG-I LR Dingliana tarlan danin, Mizoram Union Territory-a hlankai a nih hnuah January 21, 1972 khan Mizoram Police din a ni a, a din ni hian JJ Verma-a'n IGP charge a la. Tun dinhmunah Mizoram Police sanction strength chu 11,750 a ni a, post hnawhkhah zat chu 8,897 a ni.

Mizoram state a nih tirhin police sub division pakua, police station 30 leh police outpost 11 awm a; tunah chuan police sub-division 38, police station 14 leh police outpost 14 a awm.

Tun hma chuan Mizoram Police hnuaiah armed battalion hran a awm ngai lo a, Aizawl, Lunglei leh Chhimtuipuiah district armed branch a awm a, SP-in an ho ṭhin. August 1974 khan Mizoram sorkar chuan district armed branch-te chu chhûn finin, 1st Bn. MAP a din zui nghal a ni.