Mizoram sorkar ram lâkna dan Gauhati High Court-in a hnâwl

Gauhati High Court (Aizawl Bench) chuan order tichhuakin, Mizo­ram sorkarin Indian Con­stitution-a Article 371G-in a humhalhna hnuaia a siam, Mizoram (Land Acquisition, Reha­bilitation and Resettlement) Act, 2016 chu President pawm­puina a awm loh avangin a hnâwl.

Mizoram (Land Acquisition, Rehabi­lita­tion and Resettlement) Act, 2016 hi Gauhati High Court-ah khing an awm avangin, High Court chuan he mi chungchang hi a ngaihtuah a; President pawmpuina a awm loh avangin Mizoram chhunga hman theih lohah a ngai a ni.

High Court order avang hian Mizoram state chhunga MLARR Act, 2016 hnuaia land acqui­sition kalpui mêk zawng zawng chu chawlhsan nghal a ni a; Mizoram sorkar chuan Gauhati High Court thutlukna hi a appeal nghal a, Appellate Court chu rei rial loa thutlûkna chhuah thuai turin an ngen.

Gauhati High Court chuan, Lunglawna ram neitute chu zangnadawm­na pêk tur ang ang order chhuah aṭanga thla li chhungin pek tur zat tifel a, thla thum dang leh chhungin a dawngturte hnenah pêk vek turin Mizoram sorkar a hriattir bawk a; Court order hi nikum kum tawp lama tihchhuah a ni.

Land Revenue & Settlement (LRS) chuan thuchhuah siamin, land acquisition hmalâkna chu chhunzawm thuai beisei a nih thu a tarlang a, "Land acquisition chawlh-­san lailâwkin har­sat­na a thlensakte’n an hriatthiam kan beisei," an ti.