CSS Hindi teacher-te'n thawh zawm beisei

Mizoram CSS Hindi Teachers’ Association (MCHTA) hruaitute chuan, March 2017 aṭanga bân tak, Centrally sponsored cheme (CSS) hnuaia Mizorama Hindi zirtirtute chuan an hna an thawh chhunzawm ngei theih nan sorkarah an bawhzui zel thu leh, academic session tharah thawh chhunzawm leh ngei an inbeisei thu an sawi.

MCHTA hruaitute hian nimin khan Aizawl Press Club-ah thuthar thehdarh­tute an kâwm a; an vice president Lalchhuanliana chuan, hna an thawh chhunzawm leh theih nana an hmalakna kal zelah Rajya Sabha MP Ronald Sapa Tlau hmalaknain December 15, 2017-ah Human Resource Development (HRD) minister Prakash Javadekar chu a chenna inah an hmuh thu leh, January 18, 2018-ah School Education minister H Rohluna an hmuh thu a sawi.

Lalchhuanliana chuan, HRD Minister an hmuhnaah hian Prakash Javadekar chuan, Mizoramah CSS hnuaia language teacher (Hindi) scheme chu a hma aia ṭha leh changtlung zawka kalpui tum a nih thu a sawi nia sawiin, "CSS hnuaia Hindi teacher mi 1,305-te ngeiin kan thawh chhunzawm leh ngeina turin ruahmanna kalpui mek a nih thu a sawi. Mizoramah Hindi-in tun aia hma a sawn theih nan thurâwnte min pe rawh u, a tih angin MP Pu Ronald Sapa kaltlangin thurâwnte kimchang taka thlen tawh a ni," a ti.

New Delhi-ah vek minister of state for Higher & Technical Satyapal Singh, HRD Economic adviser Dr NK Sahu leh HRD under secretary Rajesh Samplay-te an hmuh thu leh, anni hnen aṭangin thu lawmawm tak an dawng niin Lalchhuanliana chuan a sawi.

Kumin January 18-ah School Edu­cation minister H Rohluna pawh a pisaah an hmuh thu sawiin Lalchhuanliana chuan, an hna chungchang an sawipui thu a sawi a, "Kan Education Minister-in kei ni mi 1,305-te’n hna kan chhunzawm leh ngei theihna tura min ngaihsakna leh hma min lakpuinaah MCHTA chuan lawmthu kan sawi a ni," a ti.

Zawhna chhangin MCHTA hruaitute chuan, sorkar laipui lama hotute an dawrnaah, Mizoramah language teacher (Hindi)-te thawh chhunzawmtir an nih dawn pawhin, a thara lakna buatsaih loin, CSS hnuaia lo thawk tawh mi 1,305-te chu thawh chhunzawmtir zel tura ruahman nia an hriat thu an sawi.

HRD hnuaia evaluation team-in Mizorama Hindi zirna dinhmun nikuma an enfiah tawh report chungchangah hriat an la neih loh thu an sawi a; CSS hnuaia Hindi zirtirtu thawk ṭhin zinga eng emaw zat chu khawtlangin sum thawh khawma an chhawr zui thu an sawi bawk.