KHAWTHLIR

Thisen pe
Lunglei District Police-te chuan Mizoram Police din champha vawi 46-na pualin nimin khan Lunglei Civil Hospital-ah thisen unit 22 an pe.

Swachh Bharat
Nimin khan Swachh Bharat Mission (Urban) leh Swachh Surveksan 2018 chungchang zirhona Lawngtlai DC conference hall-ah buatsaih a ni a, district bawrhsap Dr Arun T chuan, bawlhhlawh sawngbawl dan dik (solid waste management) a lem nen a sawifiah. NULM manager VL Ramnunsangi'n Swachh Bharat Mission (Urban) leh Swachh Surveksan 2018 a sawifiah bawk.

Champhaiah Parking fee
Nimin khan Champhai DC Vanlalngaihsaka hoin DC conference hall-ah Champhai khawpuia parking fee khawn dan tur sawiho a ni. Meeting-a rel dan chuan, Champhai khawpui chhung hmun li - Awmpui Veng, Vengthlang Dawrveng, Tuipui Bazar leh Bethel Veng kâwnahte parking fee khawn tur a ni a, darkar khatah Rs. 10 zel khawn tur niin, lirthei dah rei dan azirin tihsan zel tur a ni.

Tlân theih lo
Traffic SP C Lalthanmawia chuan thupek chhuahin, Ramhlun North-a Ruali Tuikhur aṭanga Chite lei (Ramhlun North) thlengin PWD-in kawngpui sira mipui kalna tur (pavement) an siam mek avangin, hna thawh chhung, January 23 aṭanga February 24, 2018 thlengin lirthei tlan theih a nih dawn loh thu a tarlang.